Мілінкевіч едзе ў Расею :: Хартыя'97 :: Навiны

Лідэр дэмакратычных сіл Беларусі Аляксандр Мілінкевіч 13 красавіка наведае з аднадзённым візітам Санкт-Пецярбург. Падчас перамоваў з прадстаўнікамі дэмакратычных сіл Расіі і кантактаў з расійскай прэсай Аляксандр Мілінкевіч прадставіць пазіцыю беларускіх дэмакратаў па адносінах з Расіяй ва ўмовах крызіса рэжыма ў Беларусі і пераходу да дэмакратычнай сістэмы кіравання дзяржавай.

Падчас візіту Аляксандр Мілінкевіч мае намер даць ацэнку сучаснаму стану беларуска-расійскіх адносінаў. Ён таксама акрэсліць сваё бачанне перспектываў гандлёва-эканамічных дачыненняў нашых краін, між іншага, супрацоўніцтва па пытаннях паставак газа і перапрацоўкі нафты, адносінаў да прыватызацыі беларускіх прадпрыемстваў, удзелу замежных, у тым ліку, і расійскіх інвестараў у працэсе рэфармавання беларускай эканомікі.

У палітычным блоку пытанняў, якія закране падчас візіту ў Санкт-Пецярбург лідэр дэмакратычных сіл Беларусі, стаўленне да саюза Беларусі і Расіі, супрацоўніцтва ў межах СНД і ЕўрАзЭС, ваенна-палітычнае супрацоўніцтва на двубаковым узроўні, праблема прысутнасці расійскіх вайсковых баз на тэрыторыі Беларусі, выкарыстанне сістэмы СПА дзеля вырашэння супольных задач.

Падчас візіту ў Санкт-Пецярбург Аляксандр Мілінкевіч адкажа на пытанні расійскіх СМІ, а таксама возьме ўдзел у прэсавым клубе інфармацыйнага агенцтва “Росбалт”.

Аляксандр Мілінкевіч наведае Санкт-Пецярбург на запрашэнне шэрагу палітычных структур Расіі і прадстаўнікоў беларускай дыяспары.