Аляксандра Мілінкевіча не пускаюць на БТ. Для Зімоўскага Чарнобыль больш не праблема :: Хартыя'97 :: Навiны

Першы тэлеканал Беларусі адмовіў лідэру беларускай апазіцыі Аляксандру Мілінкевічу ў прамым эфіры 25 красавіка, паведамілі "Інтэрфаксу" на тэлеканале. 6 красавіка А.Мілінкевіч пісьмова звярнуўся да старшыні Нацыянальнай дзяржаўнай тэлерадыёкампаніі Аляксандра Зімоўскага з просьбай даць яму і "прадстаўнікам экспертаў і ліквідатараў" прамы эфір 25 красавіка а 18 гадзіне, каб "даць незалежную ацэнку дзейнасці дзяржаўных органаў па пераадоленні наступстваў Чарнобыльскай аварыі".

Апазіцыйны палітык заявіў пра намер "сказаць праўду пра мэтанакіраванае замоўчванне ўладамі" праблем ліквідатараў і людзей, якім "з прычыны палітыкі ўлад даводзіцца есці прадукты з забруджаных тэрыторый".

У сваім звароце А.Мілінкевіч таксама звярнуў увагу на тое, што палітыка ўлад "не дазваляе атрымоўваць міжнародную дапамогу ў пытанні мінімізацыі наступстваў Чарнобыльскай аварыі" і запатрабаваў "спыніць рэпрэсіі супраць дэмакратычных актывістаў".

Палітык асабліва акцэнтаваў увагу на тое, што прыняцце рашэння па яго запыце "не патрабуе дадатковага вывучэння і праверкі" і нагадаў, што адказ яму павінен быць дадзены "не пазней чым за 15 дзён".

Старшыня Нацыянальнай дзяржаўнай тэлерадыёкампаніі Аляксандр Зімоўскі, адказваючы на зварот, паведаміў, што "ў эфір Першага канала, тэлеканалаў "Лад" і "Беларусь-ТВ" па традыцыі выйдуць праграмы на тэму чарнобыльскай трагедыі і пра тое, як Беларусь адна змагаецца з наступствамі гэтай глабальнай тэхнагеннай катастрофы". "Зразумела, у іх возьмуць удзел беларускія і замежныя спецыялісты і эксперты, удзельнікі ліквідацыі наступстваў аварыі на ЧАЭС", – гаворыцца ў адказе.