Крэмль атрымаў поўны кантроль над тэлеканалам Рен-ТВ :: Хартыя'97 :: Навiны

Інвестыцыйная кампанія “Абрас”, якая з’яўляецца “дачкой” пецярбургскага банка “Расея”, кантраляванага блізкім да прэзідэнта Уладзіміра Пуціна Юрыем Кавальчуком і вядомага сваімі вышэйшымі выхадцамі (Андрэй Фурсенка, Уладзімір Якунін), давяла сваю долю ў “Медиа-Холдинге Рен-ТВ” да больш як 50% акцый, паведамляе NEWSru.com. Не выключана, што неўзабаве гэтая доля будзе павялічаная за кошт 30%, якія належаць RTL Group.

Нафтавая кампанія “Сургутнефтегаз” распаўсюдзіла ўчора афіцыйнае паведамленне, у якім гаворыцца, што яна скараціла сваю долю з 100 да 25% у ЗАТ "Медиа-Инвест", які валодае 35% у ТАА "Медиа-Холдинг Рен-ТВ". Каму перайшлі 75% "Медиа-Инвеста", у "Сургутнефтегазе" не гавораць. Крыніцы, блізкія да тэлеканала Рен-ТВ, сцвярджаюць, што набыла іх інвестыцыйная кампанія "Аброс", якой да моманту пагаднення ўжо належала каля 40% Рен-ТВ, піша Газета GZT.ru.

Не выключана, што наўзамен "Сургутнефтегаз" атрымае ад структуры банка "Расея" вызначаную долю ў акцыянерным капітале іншага тэлеканала – ТРК "Пецярбург", найбуйнейшым уласнікам якой таксама з`яўляецца "Аброс". Акрамя таго, "Сургутнефтегаз" уключаны ў колькасць патэнцыйных набытчыкаў зацверджанай каля месяца таму дадатковай эмісіі ААТ АБ "Россия".

Падраздзяленне вядомага нямецкага выдавецкага канцэрна Bertelsmann ужо заяўляла пра тое, што скароціць або прадасць сваю долю ў тэлекампаніі, калі не здолее давесці яе да кантрольнай. Пасля экспансіі "Аброса" ні пра які кантроль з боку немцаў не можа ісці гаворкі.

Нагадаем, ІК "Аброс" увайшла ў шэраг акцыянераў тэлеканала Рен-ТВ яшчэ ў канцы 2006 года. Да таго моманту ўласнікамі медыяхолдынгу былі "дочкі" "Сургутнефтегаза" (35%) і "Северсталь-групп" (35%), а таксама RTL Group (30%). Паводле неафіцыйных дадзеных, у снежні "Аброс" набыў кантрольныя пакеты "дочак" "Сургутнефтегаза" і "Северсталь-групп". Тады старшынёй савета дырэктараў канала стала Любоў Савершаева з "Аброса" (ранейшая пасада – намесніца паўнамоцнага прадстаўніка прэзідэнта РФ у СЗФО), якая змяніла на гэтай пасадзе прадстаўніка "Северстали" Аляксея Германовіча.

Менавіта тады "Северсталь-групп" і "Сургутнефтегаз" страцілі кантроль над сітуацыяй. Паводле дадзеных крыніцы, блізкай да Рен-ТВ, цяпер доля кампаніі Мардашова ў медыяхолдынгу не даходзіць нават да 10%, тое самае цяпер можна сказаць і пра "Сургутнефтегаз". У прэс-службе ААТ “Северсталь” заявілі, што падзеі вакол Рен-ТВ не каментуюць, дадаўшы пры гэтым: "Мы вельмі стаміліся ад усёй гэтай сітуацыі".

Верагодна, пэўная стомленасць назапасілася і ў былога галоўнага рэдактара тэлекампаніі Іллі Кузьмянкова, які напісаў заяву аб сыходзе за тры дні да афіцыйнага паведамлення "Сургутнефтегаза". Кузьмянкоў заявіў, што пытанне змен у структуры акцыянераў да яго не мае дачынення, а адстаўка не мае ніякай палітычнай падаплёкі. "Я займаўся журналістыкай на канале", – сказаў ён.

Ілля Кузьмянкоў з`явіўся на Рен-ТВ адразу пасля змены ранейшых уласнікаў (Ирэны і Зміцера Ляснеўскіх, а таксама РАТ ЕЭС). У яго функцыі найперш уваходзіла антыкрызіснае кіраванне – змена ўладальнікаў пацягнула за сабою сыход некаторых ключавых журналістаў. Задача была выкананая, і напярэдадні новай змены ўладальнікаў Ілля Кузьмянкоў сышоў, як ён сам выказаўся, ва ўласны бізнэс. На месца галоўнага рэдактара Рен-ТВ прадказваюць былога ўпраўленца з ВГТРК Аляксея Абакумава, але гэта ўжо мала каго цікавіць: абсалютна праўрадавы разварот тэлеканала і без таго ў наяўнасці.

Эксперты і ўдзельнікі рынку лічаць, што рашэнне "Сургутнефтегаза" скараціць долю ў "Медиа-Инвест" выкліканае палітычнымі прычынаміі, адзначае РБК Daily. "Мабыць, медыйныя актывы перакладаюць з больш празрыстых рук у менш празрыстыя. У адрозненні ад кампаніі "Сургутнефтегаз" пецярбургскія банкіры менш адкрытыя для інвестыцыйных аналітыкаў, магчыма, таму ім і было вырашанае перадаць палітычна адчувальны актыў", – лічыць топ-мэнэджэр адной з буйнейшых інвестыцыйных кампаній.

З ім згаджаецца намеснік гендырэктара Цэнтра палітычных тэхналогій Аляксей Макаркін: "Буйныя кампаніі аддаюць перавагу трыманню далей ад інфармацыйнай сферы ў пазбяганне праблем, калі толькі медыя не з`яўляецца для іх важным бізнэсам. А для Юрыя Кавальчука канал Рен-ТВ як раз стратэгічны кірунак напярэдадні выбараў".

Па словах прэзідэнта Расейскай асацыяцыі рэкламных агенцтваў Уладзіміра Яўстаф’ева, усё што адбываецца цалкам чакана і празрыста. "Перад выбарамі ўсе тыя, хто мае нейкі ўплыў, падчышчаюць медыйныя актывы. Рен-ТВ у свой час было адным з уплывовых незалежных палітычных СМІ. Гэта адзін з 16 вядучых каналаў краіны, і яго значэнне нельга скідаць з рахункаў. Да выбараў засталося зусім трохі часу, і я абсалютна перакананы, што тут не можа быць простых супадзенняў", – адзначыў ён.

З гэтым згодны і адзін з былых супрацоўнікаў Рен-ТВ, які пакінуў тэлеканал у пераходным 2005 годзе: "У 2005-м змянілася тое, што ляжала на паверхні, да прыкладу, памянялася палітыка інфармацыйнай службы, сышла Вольга Раманава. Аднак застаўся дух. Цяпер рукі дайшлі і да яго".

А вось аналітык банка "Траст" Аляксей Дземкін адзначае, што скарачэнне долі "Сургутнефтегаза" было абумоўленае хутчэй эканамічнымі прычынамі: "Канкурэнцыя на рынку тэлебачання абвастраецца. І у гэтых умовах тым, хто не з`яўляецца стратэгічным інвестарам, лепш пакінуць бізнэс кампаніі. Потым кансалідаваны пакет можна перапрадаць".