«Марш нязгодных» у Маскве скончыўся пабоішчам (Фота) :: Хартыя'97 :: Навiны

Акцыі апазіцыі ў Маскве завяршыліся. Удзельнікі “Маршу нязгодных” сабраліся а 12 на Пушкінскай плошчы, якая, як і вуліцы, што да яе прылягаюць, была запоўненая АМАПам. Пры спробах скандаваць лозунгі альбо разгарнуць транспаранты людзей адразу затрымлівалі і саджалі ў міліцэйскія аўтобусы. Амапаўцы ўжывалі сілу. На Пушкінскай затрымалі Гары Каспарава, Марыю Гайдар, Іллю Яшына.

Пасля гэтага некалькі сотняў чалавек, сярод якіх быў лідэр РПР Уладзімір Рыжкоў, журналіст Яўгенія Альбац, сустаршыня Усерасійскага грамадзянскага кангрэса Георгі Сатараў зрушыліся па Страстным бульвары ў напрамку Тургенеўскай плошчы. Удзельнікі акцыі ішлі па падарожнай частцы. Яны разгарнулі сцягі ПДВ, АГФ, руху "Оборона", НБП. Скандавалі лозунгі "Расея без Пуціна!", "Пакуль мы адзіныя, мы непераможныя!", "Пуцін, сыдзі сам!".

На Калядным бульвары дарогу "Маршу" перакрыў АМАП. Пры гэтым былі жорстка збітыя некалькі чалавек. Па словах карэспандэнта Граней.Ру, прынамсі аднаго чалавека валаклі па асфальце без прытомнасці. Людзей перакідвалі праз загароды і закідвалі ў міліцэйскія аўтобусы. Двум удзельнікам маршу на Пятроўскім бульвары праламалі галовы. АМАП дзейнічаў вельмі жорстка, збіваў і затрымліваў нават пажылых людзей, якія не спрабавалі супраціўляцца.

Потым калона ўдзельнікаў "Маршу" падзялілася і накіравалася ў бок Чыстых прудоў па бакавых завулках. Там ім дарогу таксама перагароджваў АМАП, адсякаючы групы па некалькі дзесяткаў чалавек. У выніку каля тысячы чалавек дайшлі да Тургенеўскай плошчы, дзе, каб патрапіць на мітынг, ім давялося прад`яўляць свае торбы міліцыянтам і праходзіць скрозь рамкі металашукальнікаў.

Як паведаміў у эфіры радыёстанцыі "Эхо Москвы" сябра савета падмаскоўнага рэгіянальнага аддзялення НДСМ Ігар Драндзін, у АУС "Басманнае" знаходзіцца каля 40 прадстаўнікоў Народна-дэмакратычнага саюза моладзі. "Затрымалі вельмі шмат людзей, чалавек сорак, – сказаў ён. – Пасадзілі ўсіх у аўтазак і адвезлі нас у АУС "Басманнае", дзе мы цяпер знаходзімся. Нас, мабыць, хочуць абвінаваціць у тым, што мы ўдзельнічалі ў несанкцыянаваным мітынгу. Пры гэтым ніхто не прадставіўся, не сказаў, на якой падставе мы тут знаходзімся. Мы сядзім і чакаем, і на нас афармляюць пратаколы, а потым, магчыма, адвязуць у суд адразу ж”.

Як заявіў у інтэрв`ю "Эху Москвы" лідэр моладзевага "Яблока" Ілля Яшын, ён паўтары гадзіны ездзіў у аўтазаку разам з іншымі затрыманымі па Маскве, бо іх не прымалі ў цэнтральных АУС горада.

У ГУУС Масквы пацвердзілі факт затрымання лідэра Аб`яднанага грамадзянскага фронту Гары Каспарава. Ён быў затрыманы, не паспеўшы яшчэ дайсці да Пушкінскай плошчы. "Ніякіх тлумачэнняў пры затрыманні не было. Я ішоў з групай людзей па ходніку ў бок метро без сімволікі. Нас узялі ў кальцо, хапалі ўсіх", – распавёў лідэр АГФ у інтэрв`ю радыёстанцыі.

Ён назваў дзеянні АМАП "бандыцкім нападам на грамадзянаў Расеі, якія не рабілі нічога супрацьпраўнага, проста ішлі па вуліцах сваёй сталіцы".

Рыжкоў мае намер звярнуцца ў ГУУС Масквы для высвятлення прычын затрыманняў лідэраў і актывістаў пазіцыі падчас разгону "Маршу нязгодных". Акрамя таго, на меркаванне дэпутата, "неабходна ініцыяваць дзесяткі судовых пазоваў супраць пэўных службовых асоб, якія наладзілі пабоішча ў цэнтры Масквы".

Як паведамляе карэспандэнт Граней.Ру, у мітынгу на Тургенеўскай плошчы Масквы ўзялі ўдзел каля дзвюх тысяч чалавек. Мітынг працягваўся каля паўгадзіны, пасля чаго да плошчы пад`ехалі 10 аўтобусаў з амапаўцамі, якія выцеснілі людзей з плошчы ў бок метро.

На мітынгу выступілі, у прыватнасці, лідэр РНДС Міхаіл Касьянаў, сябра палітсавета РНДС Ірына Хакамада, пісьменнік Віктар Шандаровіч. Касьянаў заявіў, што асноўнае патрабаванне апазіцыі – правядзенне сумленных свабодных выбараў.

Пасля заканчэння мітынгу ўдзельнікі акцыі накіраваліся да АУС "Прэсненскі", дамагацца вызвалення Гары Каспарава і іншых лідэраў апазіцыі, затрыманых раней на Пушкінскай плошчы.

Толькі што сайт Каспаров.Ру паведаміў, што АМАП спрабуе выцесніць ад УУС Прэсненскага раёна людзей, якія патрабуюць вызвалення лідэраў "Маршу нязгодных". Між іншым, з аддзялення міліцыі адпусцілі Марыю Гайдар, Аляксандра Рыкліна. Аднак Гары Каспарава павязуць у Цвярскі суд, дзе лідэру АГФ прад`явяць штраф.

Фота yahoo.com