У Польшчы супраць Ярузельскага высунутае абвінавачанне. Яму пагражае 10 гадоў :: Хартыя'97 :: Навiны

Супраць польскага генерала Войцэха Ярузельскага ў аўторак высунутае абвінавачанне ў здзяйсненні злачынстваў падчас панавання ў краіне "камуністычнага рэжыму". У прыватнасці, генералу інкрымінуецца ўвядзенне ў 1981 годзе "вайсковага становішча" ў краіне. Адначасова такія самыя абвінавачванні высунутыя супраць яшчэ васьмі былых кіраўнікоў сацыялістычнай Польшчы. Справу вядзе варшаўскі раённы суд. У выпадку, калі 84-гадовага генерала прызнаюць вінаватым, яму пагражае да 10 гадоў турмы.

У 1968 годзе Ярузельскі стаў польскім міністрам абароны і браў актыўны ўдзел ва ўварванні войскаў СССР і яшчэ трох краін Варшаўскага пакта ў Чэхаславакію. У 1981 годзе, у разгар рэвалюцыі "Салідарнасці", ён стаў лідэрам польскай камуністычнай партыі і прэм`ер-міністрам і неўзабаве пасля гэтага ўвёў вайсковае становішча. Да 1985 года Ярузельскі стаў прэзідэнтам і займаў гэтую пасаду да 1990 года, калі яго змяніў Лех Валенса.

Ярузельскі абвінавачваецца ў "кіраўніцтве злачыннай арганізацыяй узброенага характару, якая мае мэтай здзяйсненне злачынстваў". Менавіта так у ІНП ахарактарызавалі Ваенны савет нацыянальнага выратавання, якому дзяржаўны савет ПНР перадаў уладу пасля ўвядзення вайсковага становішча ў ноч з 12 на 13 снежня 1981 года, паведамляе ІТАР-ТАСС.

Першапачаткова ІНП быў створаны ў Польшчы ў якасці арганізацыі, закліканай захоўваць архіўныя дакументы. Аднак у перыяд кіравання ў Польшчы братоў Качыньскіх, адзначаюць аналітыкі, ІНП усё больш набывае характар карна-следчага інстытута, які мае прыкметы "палітычнай паліцыі".

Дакументы, якія вінавацяць Ярузельскага і іншых былых партыйных і дзяржаўных дзеячаў сацыялістычнай Польшчы, былі накіраваныя ў варшаўскі раённы суд следчым аддзелам Інстытута нацыянальнай памяці (ІНП) у Катовіцы.

Абвінавачванні таксама высунутыя супраць генерала Чэслава Кішчака, які кіраваў у той перыяд Міністэрствам унутраных спраў Польшчы. У выпадку, калі іх прызнаюць вінаватымі, абвінавачваным пагражае да 10 гадоў турэмнага зняволення.