Флэш-моб у падтрымку Беларусі ў Таліне :: Хартыя'97 :: Навiны

У Дзень салідарнасці, 16 красавіка ў цэнтры Таліна ў парку Таамсаары прайшоў 15-мінутны флэш-моб, падчас якога прыкладна 20 чалавек моўчкі чыталі газеты з загалоўкам на перадавіцы: "Нявінны занятак? У Беларусі ты патрапіў бы за гэта ў турму!". Мэтай акцыі, арганізаванай Групай падтрымкі Беларусі, было звярнуць увагу грамадскасці на тое, што ў нашай краіне адсутнічаюць свабода слова і свабода друку.

"На акцыі пратэсту ў Маскве, якія прайшлі ў гэтыя выходныя, сродкі масавай інфармацыі Эстоніі адрэагавалі навінамі на перадавіцах і вялізнай колькасцю артыкулаў", – сказаў сябра Групы падтрымкі Беларусі Крыстэр Парыс. "Але вялікая колькасць людзей не ведае, што ў Беларусі такая дэманстрацыя сілы даўно стала звычайнай справай. Самы малы выраз незадаволенасці ўладамі – напрыклад, публічнае чытанне апазіцыйных выданняў – можа пацягнуць за сабою арышт і збіванне ў міліцэйскіх участках", – растлумачыў Парыс сімвалічнае значэнне маўклівай акцыі.

Групу падтрымкі Беларусі ў Эстоніі заснавалі грамадзянскія аб`яднанні, а таксама прыватныя асобы, якія бралі ўдзел у 2006 годзе ў прэзідэнцкіх выбарах у Беларусі ў якасці незалежных назіральнікаў. Пры падтрымцы Фонду Адкрытай Эстоніі Дзень салідарнасці адзначаецца ў Эстоніі з кастрычніка 2005 года.