ПАРЕ заклікае Еўропу да барацьбы за свабоду Беларусі :: Хартыя'97 :: Навiны

Парламенцкая Асамблея Рады Еўропы (ПАРЕ) заклікае еўрапейскія дзяржавы "праяўляць абсалютную рашучасць у дачыненні парушэнняў правоў чалавека ў Еўропе". Пра гэта гаворыцца ў заяве ПАРЕ, прынятай 18 красавіка па выніках спецыяльных спрэчак аб сітуацыі з правамі чалавека і дэмакратыі ў Еўропе. "ПАРЕ заклікае еўрапейскія дзяржавы да прыняцця мераў па барацьбе з такімі найсур`ёзнейшымі парушэннямі правоў чалавека, як гвалтоўныя знікненні людзей, пазасудовыя пакаранні смерцю, катаванні і тайнае ўтрыманне пад вартай", – гаворыцца ў заяве.

Парламентары асудзілі “разрыў паміж стандартамі на паперы і фактычнай сітуацыяй”. Яны таксама рэкамендавалі пашырыць магчымасці ПАРЕ па правядзенні расследаванняў. Акрамя таго, Асамблея вырашыла заснаваць штогадовую прэмію за “выдатныя грамадзянскія дзеянні ў галіне абароны правоў чалавека”.

Дакладчык Камісіі ПАРЕ па юрыдычных пытаннях Хрыстос Пургурыдас у сваім выступе адзначыў, што "ў шэрагу краін праваабаронцы, якія стаяць на варце правоў чалавека, самі падвяргаюцца запалохванню і рэпрэсіям”. “Прыйшоў час ператварыць словы ў дзеянні і забяспечыць сапраўднае захаванне правоў чалавека і выкананне прынцыпу вяршэнства закона. Правы чалавека павінны найперш рэалізоўвацца на нацыянальным узроўні. Каб захаваць давер, дзяржавы павінны пазбягаць падвойных стандартаў, калі яны займаюцца праблемамі, звязанымі з парушэннямі правоў чалавека”, – заявіў Х.Пургурыдас.

У адной з прынятых рэзалюцый адзначаецца, што ў Еўропе працягваюць існаваць "чорныя дзіры", дзе механізм захавання правоў чалавека здзяйсняецца не цалкам. Адной з такіх краін парламентары называюць Беларусь. "ПАРЕ глыбока занепакоеная існаваннем у Еўропе геаграфічных абласцей, уключна Беларусь, і некаторых рэгіёнаў у краінах – сябрах Рады Еўропы, дзе не выконваюцца дэмакратычныя прынцыпы", – гаворыцца ў рэзалюцыі.

ПАРЕ таксама рэкамендавала Камітэту міністраў Рады Еўропы надаць пільную ўвагу сітуацыі з правамі чалавека ў Беларусі.