Прадпрымальнікі маюць намер звярнуцца да Лукашэнкі :: Хартыя'97 :: Навiны

Прадстаўнікі малога бізнэсу з Берасця, Менска і Гарадзенскай вобласці сталі ўдзельнікамі форума "Перспектыва прадпрымальнікаў Беларусі" 23 красавіка ў Берасці. Абмеркаваўшы ўказ прэзідэнта № 760 ад 29 снежня 2006 года, прадпрымальнікі рэзюмавалі: гэты дакумент фактычна накіраваны на ліквідацыю асобных відаў прадпрымальніцкай дзейнасці.

Арганізатарам мерапрыемства выступіла рэспубліканскае грамадскае аб`яднанне "Перспектыва". Тыя, што сабраліся, падтрымалі ініцыятыву РГА "Перспектыва" накіраваць Аляксандру Лукашэнку адкрыты зварот з сваёй пазіцыяй. У самыя блізкія дні ў Берасцейскай вобласці пачнецца збор подпісаў пад зваротам. Калі голас прадпрымальнікаў не будзе пачуты ўладамі, яны пакідаюць за сабою права звярнуцца за дапамогай у адпаведныя міжнародныя арганізацыі.

У інтэрв`ю БелаПАН лідэр "Перспектывы" Анатоль Шумчанка адзначыў, што берасцейскі форум адбыўся ў рамках агульнанацыянальнай кампаніі пад лозунгам "Далучыся і падпішыся – або прайграеш!". "Аналагічнае мерапрыемства мы ўжо правялі ў Менску. І я магу сказаць, што ў індывідуальных прадпрымальнікаў адназначнае стаўленне да прэзідэнцкага ўказу № 760: яны лічаць, што ён абсурдны і супярэчыць Канстытуцыі ў частцы наймання працаўнікоў толькі з сваякоў, – сказаў А.Шумчанка. – Сёння ў Берасці я пачуў, наколькі глыбока і сур`ёзна прадпрымальнікі пралічылі, як адаб`ецца на іх новы дакумент. І калі яго не адмяніць, то наступствы могуць мець незваротны характар для аўтарытэту дзейнай улады, а палітычныя погляды прадпрымальнікаў могуць рэзка трансфармавацца".

Лідэр "Перспектывы" выказаў надзею на тое, што такую самую падтрымку іх ініцыятыва атрымае і ў іншых рэгіёнах краіны – гэта дазволіць выпрацаваць агульную пазіцыю і паспяхова правесці дыялог з уладамі.

Наступны такі форум адбудзецца 30 красавіка ў Віцебску.

Нагадаем, што паводле ўказу № 760, з 1 студзеня 2008 года індывідуальныя прадпрымальнікі могуць наймаць на працу толькі членаў сям`і і блізкіх сваякоў (не больш за трох чалавек). Індывідуальны прадпрымальнік, які хоча працаваць з прыцягненнем наёмных працаўнікоў, павінен прайсці працэдуру трансфармацыі ў юрыдычную асобу – мікрапрадпрыемства.