Пуцін перанёс на дзень свой выступ з пасланнем да Федэральнага сходу з прычыны жалобы :: Хартыя'97 :: Навiны

Прэзідэнт Расеі Уладзімір Пуцін перанёс на дзень свой зварот да Федэральнага сходу з штогадовым пасланнем аб становішчы ў краіне, аб асноўных кірунках унутранай і знешняй палітыкі дзяржавы. Ён адбудзецца 26 красавіка а 12:00 у Мармуровай зале Маскоўскага Крамля, паведамляе РІА "Новости" са спасылкай на прэс-службу Крамля.

Загад аб пераносе ў сувязі з смерцю Барыса Ельцына даты абвяшчэння штогадовага паслання прэзідэнт падпісаў у панядзелак. Раней абвяшчэнне паслання планавалася на сераду, аднак 25 красавіка – дзень пахавання Ельцына – прэзідэнт абвясціў днём жалобы.

Пахаванне Ельцына адбудзецца ў сераду, 25 красавіка на Навадзевічых могілках. Развітанне з першым прэзідэнтам Расеі адбудзецца ў храме Хрыста Выратавальніка.

Першы прэзідэнт Расеі Барыс Ельцын раптоўна сканаў у панядзелак на 77-м годзе жыцця. Ельцын памёр у 15:45 у Цэнтральным клінічным шпіталі ў Маскве. Ён быў адзіным кіраўніком расейскай дзяржавы, які добраахвотна сышоў ад улады, і адзіны расейскі лідэр, хто папрасіў прабачэння ў сваіх суайчыннікаў за свае памылкі.

Прычынай смерці Ельцына стала раптоўнае спыненне сэрца. Як удакладніў кіраўнік медцэнтра ўпраўлення справамі прэзідэнта, Ельцын сканаў ад прагрэсавання сардэчна-сасудзістай паліорганнай недастатковасці. Па словах аднаго з аднакурснікаў Ельцына Анатоля Южанінава, "ён хварэў апошні час і ўжо не хадзіў".