Лукашэнка: «Наша супрацоўніцтва з Азербайджанам – не піар» :: Хартыя'97 :: Навiны

Супрацоўніцтва Беларусі і Азербайджана будзе развівацца паступова, "не насуперак нядобразычліўцам, а на дабро нашым народам", – заявіў Аляксандр Лукашэнка ў сераду пасля сустрэчы ў Баку з прэзідэнтам Азербайджана Ільхамам Аліевым.

"Ёсць у нас нядобразычліўцы, якія часам з неўхваленнем успрымаюць рэзка нарастаючае супрацоўніцтва, але супрацоўнічаем мы не насуперак ім, а на дабро нашым народам", – адзначыў А.Лукашэнка. Ён падкрэсліў, што Азербайджан з`яўляецца "краінай, якая дынамічна развіваецца", адзначыўшы пры гэтым, што Азербайджан займае першае месца ў свеце па маштабах росту ВУП, паведамляе “Інтэрфакс”.

Кіраўнік Беларусі канстатаваў развіццё партнёрства з Азербайджанам у самых розных сферах эканомікі. "Некаторыя нядобразычліўцы расцэньвалі гэтае супрацоўніцтва як нейкі піар. Гэта не піар", – падкрэсліў А.Лукашэнка.

"Мы не збіраемся супраць кагосьці сябраваць. Мы за тое, каб да нашых праектаў далучаліся і іншыя, калі гэта магчыма", – сказаў А.Лукашэнка.

А.Лукашэнка адзначыў, што азербайджанцы, якія пражываюць на тэрыторыі Беларусі, камфортна сябе адчуваюць і працуюць. "У нас вельмі добрыя стасункі паміж народамі. Ніводны азербайджанец не скажа, што яму ў Беларусі дрэнна", – канстатаваў А.Лукашэнка.

У сваю чаргу прэзідэнт Азербайджана І.Аліеў з задавальненнем канстатаваў дынаміку развіцця гандлёва-эканамічных стасункаў з Беларуссю. "Сёння мы ўпэўнена рухаемся па шляху інтэграцыі", – адзначыў І.Аліеў. "З цеплынёй успамінаю мой нядаўні візіт у Менск, дзе былі дасягнутыя вельмі шмат дамоўленасцяў, шматлікія з якіх ужо рэалізуюцца", – сказаў І.Аліеў.

"Нашы краіны ў эканоміцы ўзаемадзейнічаюць і ўзаемадапаўняюць адзін аднаго. Мы да гэтага гатовыя", – адзначыў І.Аліеў.