Пан Гі Мун: ААН будзе абараняць усіх людзей, чый талент і адданасць справе служаць залогам свабоды слова :: Хартыя'97 :: Навiны

За апошні год у свеце больш як 150 прафесійных супрацоўнікаў СМІ загінулі, выконваючы свой абавязак, гаворыцца ў пасланні генеральнага сакратара ААН Пан Гі Муна з нагоды сусветнага дня свабоды друку, які адзначаецца 3 траўня.

Шматлікія прадстаўнікі СМІ былі параненыя, затрыманыя, падвяргаліся пераследам альбо былі ўзятыя ў заложнікі. "Гэта адбываецца не толькі ва ўмовах узброеных канфліктаў, але і ў тых выпадках, калі журналісты расследуюць выпадкі карупцыі або пішуць пра галечу і злоўжыванні ўладай", – падкрэсліваецца ў пасланні кіраўніка ААН, якое цытуе ў сераду служба навін ААН.

Пан Гі Мун адзначыў, што сёння ўсё больш і больш людзей атрымліваюць магчымасць выходзіць на шырокую аўдыторыю і даносіць да яе свае думкі.

Разам з тым, занадта часта яны сутыкаюцца з спробамі абмежаваць, забараніць альбо заблакаваць паток інфармацыі і ідэй. Генеральны сакратар ААН з трывогай адзначыў, што журналісты, якія імкнуцца распавесці пра беды іншых людзей, часта становяцца аб`ектам нападаў.

Пан Гі Мун заявіў, што замахі на свабоду друку – гэта замахі на міжнароднае права і чалавечнасць, і запэўніў, што ААН стаіць і будзе стаяць на варце гэтай свабоды і будзе абараняць усіх людзей, чый талент і адданасць справе служаць яе закладам.

"Свабодны, абаронены і незалежны друк уяўляе сабою адзін з асноватворных элементаў дэмакратыі і міру. Урады, міжнародныя арганізацыі, сродкі масавай інфармацыі і грамадзянская супольнасць павінны іграць належную ролю ў падтрыманні гэтых фундаментальных прынцыпаў", – падкрэсліў Пан Гі Мун.