ЕЗ не адменіць гандлёвыя санкцыі ў дачыненні Беларусі :: Хартыя'97 :: Навiны

Еўрапейскі Звяз не адменіць гандлёвыя санкцыі наўзамен згоды Беларусі адкрыць прадстаўніцтва Еўракамісіі ў Менску. Пра гэта ў інтэрв`ю бельгійскаму выданню "EUobserver" заявіў адзін з службоўцаў ЕЗ.

Еўрапейскі дыпламат падкрэсліў, што рашэнне аб адкрыцці прадстаўніцтва Еўракамісіі ў Менску і выключэнне Беларусі з Генеральнай сістэмы прэферэнцыяў (ГСП) – "цалкам розныя рэчы". "Мы сказалі ім: не чакайце наўзамен рашэння па ГСП, – сказаў прадстаўнік ЕЗ. – Адкрыццё офіса Еўракамісіі – гэта добры крок. Але ён не павінен успрымацца як прарыў. Калі пачнуць вызваляць палітычных зняволеных, вось гэта будзе вялікім крокам", – паведамляе БелаПАН.

Прадстаўнік ЕЗ нагадаў, што рашэнне аб выключэнні Беларусі з ГСП уступіць у сілу 21 чэрвеня. Па яго словах, пра адмену гандлёвых ільгот Беларусь можа губляць штогод да 400 млн. еўра.

Нагадаем, 26 красавіка, адказваючы на пытанні журналістаў у Быхаве (Магілёўская вобласць), Аляксандр Лукашэнка станоўча ацаніў рашэнне аб адкрыцці ў Менску прадстаўніцтва Еўракамісіі. На думку А.Лукашэнкі, гэта акт добрай волі з боку Беларусі. Пры гэтым ён падкрэсліў, што прадстаўніцтва Еўракамісіі "ўсё роўна будзе працаваць у пэўных рамках".

Лукашэнка таксама заявіў, што пасля дадзенага рашэння беларускі бок чакае адпаведных крокаў ад Еўразвяза. Калі іх не будзе, стане зразумела, што Еўропа не хоча на роўных весці дыялог з Беларуссю, падкрэсліў А.Лукашэнка.