Леанід Злотнікаў: «Колькасць стратных прадпрыемстваў будзе толькі расці» :: Хартыя'97 :: Навiны

Аляксандр Лукашэнка чарговым разам заявіў пра спыненне дзяржпадтрымкі стратных прадпрыемстваў. Незалежныя эканамісты сцвярджаюць, што глабальнага спынення датацыяў не адбудзецца.

Выступаючы з пасланнем народу і парламенту Аляксандр Лукашэнка растлумачыў бессэнсоўнасць падтрымкі прадпрыемстваў, якія гэтыя грошы проста праядаюць:

«Вы толькі ўдумайцеся, у 2006 годзе ўмовы аказання дзяржпадтрымкі не выканалі 36% арганізацый, якія яе атрымалі. А прэферэнцыі былі прадстаўленыя больш як 3 тыс. арганізацый на агульную суму звыш 1 млрд. даляраў».

Таму, як заявіў Аляксандр Лукашэнка:

«Каб раз і назаўжды гэтую лавачку зачыніць, гэты год у нас прадпрыемствы сякія-такія яшчэ атрымаюць дзяржпадтрымку, а на будучы год, наперадзе не першы год, калі я пра гэта кажу, плануйце сваю вытворчасць і забяспечвайце сябе самі. Мы будзем падтрымліваць толькі навукаёмістыя, найноўшыя тэхналогіі, якія будуць прыходзіць у нашу краіну».

Пры гэтым беларускі кіраўнік заявіў, што стратныя вытворчасці можна будзе прыватызаваць:

«Калі дзяржава не ў стане падняць прадпрыемства або гэта невыгодна – выносіце на продаж».

Аднак заявы пра спыненне дзяржпадтрымкі стратных прадпрыемстваў з вуснаў Аляксандра Лукашэнкі гучаць ужо не першы год, а дзяржпадтрымка не спыняецца. Як заявіў у інтэрв`ю «Нямецкай хвалі» незалежны эканаміст Леанід Злотнікаў, калі на пачатак года колькасць стратных прадпрыемстваў у прамысловасці складала каля 30%, то ўмовы гаспадарання, якія пагаршаюцца, здольныя прывесці да росту дадзенага паказчыку:

«Можна чакаць, што колькасць стратных прадпрыемстваў будзе большай. Яны, пэўна, будуць ураўноўвацца колькасці неплацежаздольных прадпрыемстваў, якіх цяпер каля 40-50 адсоткаў. Спыніць падтрымку гэтым прадпрыемствам – гэта раўназначна падрыву палітычнага рэжыму, які цяпер існуе. Мне здаецца, у нейкай форме гэтая падтрымка застанецца».

Пры гэтым Леанід Злотнікаў адзначыў, што сур`ёзнай прыватызацыі чакаць не варта, бо для гэтага таксама трэба змяняць сістэму гаспадарання ў краіне. Аднак некаторая прыватызацыя ўсё-ткі можа адбыцца:

«Нейкія грошы могуць быць за кошт прыватызацыі. І гэтыя грошы могуць зноў пайсці на падтрымку вось такім стратным».

На меркаванне юрыста і эканаміста Сяргея Балыкіна, дзяржава і ў будучым годзе ад датацыяў стратных прадпрыемстваў не адмовіцца.

«Пытанне толькі ў тым, якія маштабы будзе мець гэтая дзяржпадтрымка. Але я больш як перакананы, што імкненне дзяржавы кантраляваць эканоміку, кантраляваць уласнасць захаваецца яшчэ даволі доўга».

А пакуль гэтае імкненне ў кіраўніцтва краіны будзе пераважаць над імкненнем да нармальных рынкавых ператварэнняў, на думку Балыкіна, чакаць адмовы ад датацыяў стратных прадпрыемстваў і маштабнай прыватызацыі не варта.