Расейскія нафтавыя кампаніі патрабуюць ад Беларусі прэміяльных :: Хартыя'97 :: Навiны

Расейскія кампаніі прапанавалі беларускаму боку павялічыць для іх памер прэміі за пастаўку давальніцкай сыравіны з мэтай падвышэння прывабнасці нафтаперапрацоўкі ў Беларусі, паведаміла інфармацыйнае агенцтва ПРАЙМ-ТАСС са спасылкай на крыніцу ў органах дзяржаўнага ўпраўлення Беларусі.

Атрымаць каментар наконт гэтага ў канцэрне "Белнафтахім" і ў расейскіх кампаній у БелаПАН пакуль не атрымалася.

Крыніца паведаміла ПРАЙМ-ТАСС, што ў красавіку практычна ўсе расейскія кампаніі-"давальцы", за выключэннем "Роснафты", адмовіліся ад паставак нафты на беларускія нафтаперапрацоўчыя заводы (НПЗ) на перапрацоўку з прычыны неўрэгуляваных правіл працы. Па яе дадзеных, большасць расейскіх кампаній, хутчэй за ўсё, адмовяцца ад перапрацоўкі нафты на беларускіх НПЗ і ў траўні.

Канцэрн "Белнафтахім" у красавіку накіраваў расейскім кампаніям лісты з прапановай аднавіць давальніцкую пастаўку нафты. Пры гэтым, па словах крыніцы, беларускі бок не здолеў прапанаваць кампаніям новыя ўмовы працы ў Беларусі, якія дазваляюць ім мець тут прыбытковую перапрацоўку. "У адказ найбуйнейшыя расейскія кампаніі – "Лукойл", ТНК-ВР, "Руснафта" і іншыя прапанавалі беларускаму боку павялічыць прэмію для пастаўшчыкоў нафты, што дазволіць ім атрымаць прыбытак пасля перапрацоўкі нафты ў Беларусі і экспарту нафтапрадуктаў", – адзначыла крыніца. Па яе словах, гаворка ідзе пра павелічэнне прэміі з 10 да 30 даляраў за тону. "Беларускі бок пакуль не даў адказу на гэтую прапанову", – сказала крыніца.

Як паведамлялася раней, у канцы студзеня вядучыя расейскія кампаніі – "Лукойл", "Татнафта", "Роснафта", "Руснафта", "Газпром нафта", ТНК-BP і "Сургутнефтегаз" – падпісалі пагадненне па новай формуле цаны. У яе ўваходзіць і 10 даляраў за тону ў якасці прэміі расейскім нафтавым кампаніям.

Камісія па імпарце энергарэсурсаў пры Савеце міністраў Беларусі нядаўна прыняла рашэнне аб падаванні нафтаперапрацоўнікам субсідыі на ўзроўні 90% ад стаўкі экспартнай пошліны на нафту. Аднак, адпаведны ўказ прэзідэнта пакуль не падпісаны, падчас абмеркаванняў гэтага дакумента на прэзідыуме Савета міністраў прынятае рашэнне занесці ў яго некаторыя карэктывы.

Як паведамляе ПРАЙМ-ТАСС, у сувязі з сыходам "давальцаў" НПЗ у траўні без уліку перапрацоўкі беларускай нафты неабходна будзе закупіць 1,9 мільёна тон расейскай нафты, што ў 1,9 разоў больш, чым у красавіку, у тым ліку "Нафтану" – 915 тысяч тон, Мазырскаму НПЗ – 975 тысяч тон. Каб закупіць такі аб`ём нафты, запатрабуецца каля 670 мільёнаў даляраў, аднак у траўні заводы здолеюць накіраваць на гэтыя мэты каля 430 мільёнаў даляраў уласных сродкаў і крэдытаў банкаў.