Вярхоўны суд ліквідаваў Беларускі літаратурны фонд :: Хартыя'97 :: Навiны

Вярхоўны суд задаволіў пазоў Міністэрства юстыцыі аб ліквідацыі грамадскага аб`яднання "Беларускі літаратурны фонд" (БЛФ). Абвяшчэнне рашэння суду па гэтай грамадзянскай справе адбылося сёння. Суд палічыў законнымі падставы для ліквідацыі грамадскага аб`яднання, якія прадставіў Мінюст.

Як адзначыў у пазове Мінюст, на працягу сваёй дзейнасці БЛФ дапусціў шэраг парушэнняў заканадаўства і ўласнага статуту. У прыватнасці, у студзені 2006 года Мінюст вынес БЛФ пісьмовае папярэджанне за выкарыстанне бланкаў, пячатак і эмблемы, якія не адказвалі патрабаванням заканадаўства.

У студзені 2006 года Мінюст вынес гэтаму грамадскаму аб`яднанню паўторнае папярэджанне нібыта з прычыны адсутнасці ў арганізацыі належнага ўліку сваіх сябраў і незахавання статуту пры правядзенні агульнага сходу БЛФ у 2005 годзе.

Акрамя таго, у кастрычніку 2006 года адбыліся змены ў складзе кіруючага органа БЛФ, пра што Мінюст не быў абвешчаны ва ўсталяваны законам тэрмін. За гэтае парушэнне Міністэрства ізноў вынесла БФЛ пісьмовае папярэджанне.

У пазове Мінюста таксама адзначаецца, што БФЛ з`яўляецца ўласнікам санаторыя-прафілакторыя пісьменнікаў "Іслачь", які не функцыянуе з верасня 2002 года. Карпусы гэтай аздараўленчай установы знаходзяцца ў аварыйным стане, а зямельны ўчастак, на якім размешчаны санаторый, выкарыстоўваецца з парушэннем зямельнага заканадаўства.

Вярхоўны суд усклаў абавязкі па ажыццяўленні ліквідацыі і стварэнні ліквідацыйнай камісіі на кіраванне БЛФ. Кантроль за правядзеннем ліквідацыі будзе праводзіць Мінюст.

Рашэнне суду ўступае ў сілу неадкладна і касацыйнаму абскарджанню і апратэставанню не падлягае.

Грамадскае аб`яднанне "Беларускі літаратурны фонд" было зарэгістраванае ў 1992 годзе.