Канцэрт «Крамы» пройдзе 30 траўня :: Хартыя'97 :: Навiны

Дазволу ад упраўлення культуры Мінгарвыканкаму на арганізацыю і правядзенне канцэрта-прэзентацыі свайго новага альбома гурт “Крама” пакуль не атрымала, але ён усё ж такі адбудзецца. Канцэрт пройдзе 30 траўня ў клубе “NIGHT STAR”, што па вуліцы Свярдлова, 2.

Пра гэта “Еўрапейскаму радыё для Беларусі” паведаміў адміністратар гурта Павел Кашырын.

“Канцэрт мы будем рабіць незалежна ад таго, дадуць мне гэтую ганебную паперку альбо не”, --- адказаў адміністратар.

Нагадаем, што заяўку на правядзенне канцэрту Павел Кашырын падаў ва ўпраўленне культуры Мінгарвыканкаму яшчэ 15 сакавіка. 25 красавіка чыноўнікі згаданай установы параілі музыкам звярнуцца па дазвол у вышэйшую інстанцыю – Міністэрства культуры альбо ў адпаведны аддзел Адміністрацыі прэзідэнта.

Як на той момант заўважыў Павел Кашырын, “адмовы на правядзенне канцэрту не было, але не было і дазволу”.

Сёння з памяшканнем і днём правядзення канцэрта-прэзентацыі музыкі “Крамы” вызначыліся.

“У нас у тым клубе знайшоўся знаёмы арт-менеджэр, і ён паабяцаў, што ўсё будзе ў парадку. Іншая справа, што калі мы будзем мець афіцыйны дазвол, у нас будуць развязаныя рукі. Мы зможам даваць рэкламу канцэрта ў метро, іншых месцах. А так усё абмяжоваецца Інтэрнэтам і перадачай інфармацыі адзін аднаму праз сяброў”, -- паведаміў Кашырын.

Зала клуба разлічаная на 400 месцаў. Павел Кашырын упэўнены, што на сённяшні дзень і ў тых умовах, якіх знахозіцца беларускі рок-н-рол, гэта дастаткова для правядзення канцэрта. Нават у тым выпадку, калі “Краме” дадуць разавую ліцэнзію на правядзенне канцэрта, хлопцы не будуць мяняць месца правядзення прэзентацыі.

А спадзяванні такія ў арганізатара да гэтага часу ёсць – на 15 гадзінаў пятніцы 4 траўня ў Паўла Кашырына прызначаная сустрэча з кіраўніком упраўлення культуры Мінгарвыканкаму Віктарам Курашам.

Між тым, спадзяванні на атрыманне станоўчага рашэння Павел Кашырын не звязвае толькі з атрыманнем разавай ліцэнзіі на правядзенне канцэрту. Ён лічыць, што калі такое адбудзецца, сам гэты факт будзе мець больш значныя наступствы.

“Мы зробім сапраўдны прарыў. Бо калі гады тры-чатыры таму факт выдачы ліцэнзіі на правядзенне канцерта не ўяўляў з сябе нічога выбітнага – далі і далі, – то сёння гэта будзе выглядаць нейкай невялічкай перамогай над сістэмай”, -- кажа адміністратар.

Аднак да перамогі яшчэ далёка і Павел Кашырын выдатна гэта разумее:

“Праблемы могуць узнікнуць у любы момант. На кіраўніка ўпраўлення могуць націснуць зверху. З іншага боку ён выдатна разумее, чым гэта можа абярнуцца і якія мець наступствы. Таму, спадзяюся, усё будзе добра”.