Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Генэральнае консульства Эстоніі накіравала ноту ў МЗС Беларусі 17:10, 04/05/2007
Каля шасьцідзесяці сяброў БРСМ і актывістаў вэтэранскіх арганізацыяў сёньня зноў пікетавалі будынак генэральнага консульства Эстоніі ў Менску. Яны пратэстуюць супраць пераносу помніка савецкаму салдату ў Таліне. Генэральнае консульства Эстоніі накіравала ноту беларускаму Міністэрству замежных справаў. Як паведаміла «Радыё Свабода», у ёй гаворыцца, што эстонскі бок ня быў папярэджаны беларускімі ўладамі аб правядзеньні пікетаваньня.
У консульстве сказалі, што толькі з мэдыяў даведаліся, што пікетаваньне працягнецца да 10 траўня.
Учора з-за пікетаваньня консульства не прымала дакумэнтаў на візы, бо дыпляматы не маглі выйсьці з будынку.
Паводле графіку працы, сёньня консульства таксама не прымала дакумэнтаў. Ці будзе яно працаваць у панядзелак, пакуль невядома.
Але, як сказалі ў генэральным консульстве, калі працягнецца пікетаваньне, то выдаваць візы будзе немагчыма.
Пакуль беларускае МЗС адказу на ноту консульства не даслала.
Сёньня на месцы пікету каля генэральнага консульства Эстоніі былі міліцыянты.
