Расея гатовая мадэрнізаваць АЭС у Славаччыне і пашыраць супрацоўніцтва ў нафтагазавай сферы :: Хартыя'97 :: Навiны

Расея гатовая мадэрнізаваць АЭС у Славаччыне і пашыраць супрацоўніцтва з ёй у нафтагазавай сферы, заявіў на сустрэчы з прэм`ер-міністрам Славаччыны Робертам Фіцам расейскі лідэр Уладзімір Пуцін, паведамляе NEWSru.com.

"Расея пастаўляе вуглевадароды ў Славаччыну, ваша краіна з`яўляецца вялікім транзіцёрам, я ведаю, што гаспадарчыя суб`екты разглядаюць магчымасць пашырэння супрацоўніцтва ў гэтай сферы", – сказаў Пуцін, адчыняючы сустрэчу. Тое самае тычыцца супрацоўніцтва ў ядзернай энергетыцы. "Мы не толькі пастаўляем ядзернае паліва (на АЭС у Славаччыну), але і гатовыя ўзяць удзел у мадэрнізацыі аб`ектаў ядзернай энергетыкі ў Славаччыне", – сказаў прэзідэнт.

Як раней казаў міністр эканомікі Славаччыны Любамір Ягнатэк, гаворка ідзе пра магчымае стварэнні Кансорцыума з удзелам еўрапейскіх і расейскіх кампаній па будаўніцтве двух блокаў АЭС у Яслоўску–Багуніцы, нагадвае ІТАР-ТАСС. Абмяркоўваецца і прапанова стварэння Кансорцыума па дабудоўцы трэцяга і чацвёртага блока АЭС у Махаўцэ, якая на 66% належыць адной з італьянскіх кампаній. Як мяркуецца, гэты праект можна было б "ажыццявіць з расейскімі спецыялістамі і тэхналогіямі".

Сярод эканамічных тэм расейскі лідэр найперш назваў "энергетыку, нафту, газ, ядзерную энергетыку". "Важным элементам супрацоўніцтва з`яўляецца сфера высокіх тэхналогій, транспарт", – дадаў кіраўнік расейскай дзяржавы. На яго думку, "тут могуць быць рэалізаваныя вельмі буйныя агульнаеўрапейскія праекты". "Нам ёсць пра што паразмаўляць, спадзяюся, Ваш візіт будзе насычаны рашэннем дзелавых пытанняў", – сказаў Пуцін.

Фіца згадзіўся з ацэнкай перспектыў энергетычнага супрацоўніцтва і назваў Расею надзейным партнёрам па пастаўках нафты і газу. Ён спадзяецца, што ў 2009 годзе "Газпром" і канцэрн СПП падпішуць новы кантракт наўзамен цяперашняга, які мінае ў 2008 годзе. "Жадаю паўтарыць перакананне, якое мы выказвалі падчас сітуацыяй з Беларуссю, якая абвастрылася, – мы лічым Расею надзейным і перспектыўным партнёрам па пастаўках".

Фіца адзначыў, што цана газу прадвызначае сацыяльна-эканамічнае становішча ў краіне. "Славаччына амаль на 98 % павінна карыстацца пастаўкамі нафты з Расеі. Там становішча трохі лепшае, кантракт дзейнічае да 2014 года", – адзначыў славацкі прэм`ер.

"Згодны з вамі, што энергетыка, па ўсёй бачнасці, у будучыні будзе той галіной, дзе супрацоўніцтва будзе самым інтэнсіўным", – звярнуўся Фіца да Пуціна.

Ён падкрэсліў, што паміж Расеяй і Славаччынай не існуе нявырашаных праблем, але мае намер абмеркаваць з прэзідэнтам РФ некаторыя міжнародныя тэмы. "Мы можам засяродзіцца на добрым узаемавыгадным эканамічным узаемадзеянні", – сказаў славацкі прэм`ер.

Прэзідэнт РФ прымаў дэлегацыю Славаччыны ў сваёй падмаскоўнай рэзідэнцыі Нова-Агарова. Пуцін звяртаўся да прадстаўнікоў Славаччыны: "сябры, калегі". "Мы дзякуем за такую форму прыёму, мы адчуваем, што знаходзімся ў надзвычай прыемным становішчы", – сказаў Фіца.