На месца аварыі на нафтапрадуктаправодзе выехала кіраўніцтва МНС :: Хартыя'97 :: Навiны

На месца аварыі на нафтапрадуктаправодзе Унеча–Вентспілс у Бешанковіцкім раёне Віцебскай вобласці вылецеў намеснік міністра па надзвычайных сітуацыях Беларусі Барыс Барынгольц, паведаміў прэс-сакратар МНЗ Віталь Навіцкі. "Для ўдакладнення аб`ёмаў уцечкі дызельнага паліва з нафтапрадуктаправода Унеча–Вентспілс і наступстваў дадзенай аварыі з Менска ў Бешанковіцкі раён вылецеў на гелікоптэры Б.Барынгольц", – паведаміў В.Навіцкі.

Ён таксама ўдакладніў, што "па папярэдніх ацэнках, з трубаправода выцекла каля 5 тон дызельнага паліва, якое патрапіла на зямлю, і часткова ў меліярацыйныя каналы". "Па папярэдняй версіі, прычынай выцякання з`явілася расслаенне зварачных швоў на трубаправодзе", – паведаміў В.Навіцкі. Ён таксама паведаміў, што на меліярацыйных каналах, куды патрапіла дызельнае паліва, усталявана не менш як 7 перакрыццяў для таго, каб дызельнае паліва не магло патрапіць у раку Свечанка, прыток Уллы.

Як раней паведамляў "Інтэрфакс", са спасылкай на прэс-сакратара Міністэрства прыродных рэсурсаў і аховы навакольнага асяроддзя Беларусі Алену Пенязь, сёння ў 8.35 каля вёскі Бабаева Бешанковіцкага раёна Віцебскай вобласці адбылася аварыя на прадуктаправодзе Унеча–Вентспілс, які належыць расейскаму адкрытаму акцыянернаму таварыству "Транснафтапрадукт". Дызельнае паліва патрапіла ў меліярацыйны канал і глебу, цяпер Міністэрствам прыродных рэсурсаў і аховы навакольнага асяроддзя вырабляюцца ўсе меры па недапушчэнні забруджвання ракі Свечанка, прыток ракі Уллы, адзначыла А.Пенязь.

Як раней паведамлялася, 23 сакавіка на ўчастку нафтапрадуктаправода Унеча–Вентспілс кампаніі "Захад-Транснафтапрадукт" ("дачка" расейскай АК "Транснафтапрадукт") адбылася разгерметызацыя трубы, у выніку чаго ў Заходнюю Дзвіну ў Бешанковіцкім раёне ў Віцебскай вобласці Беларусі выцекла каля 120 тон дызельнага паліва.