Па факце вандалізму на габрэйскіх могілках Барысава ўзбуджаная крымінальная справа :: Хартыя'97 :: Навiны

Аддзелам унутраных спраў Барысаўскага райвыканкама (Менская вобласць) 3 траўня была ўзбуджанае крымінальная справа па факце вандалізму на габрэйскіх могілках Барысава, размешчаных па вуліцы 8 Сакавіка.

Як паведаміў БелаПАН старшыня гарадскога габрэйскага грамадскага аб`яднання «Святло мяноры» Саюза беларускіх габрэйскіх грамадскіх аб`яднанняў і суполак Міхаіл Перац, справа ўзбуджаная па артыкуле 347, частка 1 Крымінальнага кодэкса Беларусі (здзек над трупам або магілай). Яна прадугледжвае пакаранне ў відзе штрафу, або арышту да шасці месяцаў, або абмежаванні альбо пазбаўленні свабоды на тэрмін да трох гадоў.

«Невядомыя скінулі з пастаментаў 16 помнікаў з прыроднага каменя, – паведаміў М.Перац. — Ад удару раскалолася адна з надмагільных пліт — самая масіўная і дарагая, вырабленая з паліраванага ружовага граніту». Па яго словах, такі выпадак апаганення помнікаў адбыўся на гэтых самых могілках прыкладна пяць гадоў таму. «Аднак злачынцаў тады, на жаль, не знайшлі», — сказаў М.Перац.

Ён выказаў удзячнасць мясцовым уладам, якія, па яго словах, «вельмі сур`ёзна» адрэагавалі на заявы аб неабходнасці ўзбуджэння крымінальнай справы па факце вандалізму, якія паступілі ад кіраўніцтва суполкі «Святло мяноры» і адной з сваячак пахаванага на могілках. Старшыня суполкі выказаў надзею, што асобы злачынцаў будуць усталяваныя і яны панясуць належнае пакаранне. «У адваротным выпадку будзе вельмі дрэнна, бо беспакаранасць спараджае рэцыдывы злачынстваў», — сказаў М.Перац.

Па яго словах, габрэйская суполка Барысава ўключае каля 500 чалавек, з якіх прыкладна палова – сем`і габрэяў.