У Гомельскай вобласці адбудзецца мітынг супраць адмены льгот студэнтам :: Хартыя'97 :: Навiны

Аргкамітэт па стварэнні партыі “Шлях свабоды і прагрэсу” па Гомельскай вобласці падаў заяўку на правядзенне мітынгу супраць планаванай адмены льгот студэнтам. Як паведаміў БелаПАН рэгіянальны каардынатар аргкамітэта Пётр Кузняцоў, падпісаная ім заява на правядзенне 20 траўня масавага мерапрыемства была 4 траўня зарэгістраваная ў Гомельскім гарвыканкаме.

Па словах П.Кузняцова, актывісты абласнога цэнтра хочуць падтрымаць ініцыятыву шэрагу менскіх грамадскіх аб`яднанняў, якія таксама падалі заяўку на правядзенне аналагічнага мітынгу ў сталіцы. "Кампанія супраць меркаванай адмены льгот павінна прайсці па ўсёй краіне, а не толькі ў Менску – толькі так чагосьці можна дамагчыся. Таму мы вырашыліся на такую акцыю салідарнасці. З прычыны таго, што ў аргкамітэце партыі "Шлях свабоды і прагрэсу" ў асноўным моладзь, мэтай мітынгу мы вызначылі пытанне аб меркаванай адмене льгот студэнтам. Лічым, што лепш не распыляцца. Бо існуе дастаткова арганізацый, якія маглі б паспрабаваць абараніць тых жа ліквідатараў, прадстаўнікоў іншых сацыяльных груп", – лічыць П.Кузняцоў.

Актывіст сумняваецца, што гарадскія ўлады дадуць дазвол на правядзенне масавага мерапрыемства. "Мы ўлічваем гэта пры будаванні сваёй інфармацыйнай працы. Вельмі важна данесці сутнасць праблемы да насельніцтва", – дадаў П.Кузняцоў.