Аляксандр Мілінкевіч павіншаваў новага прэзідэнта Францыі :: Хартыя'97 :: Навiны

Віншаванне з перамогай на прэзідэнцкіх выбарах накіраваў Ніколя Сарказі старшыня Палітрады дэмакратычных сіл Беларусі Аляксандр Мілінкевіч. “Я вельмі хачу павіншаваць Вас і пажадаць поспехаў у Вашай магутнай задачы годна адказаць на ўсе выклікі, што стаяць перад Вашай краінай. Я веру, што падчас Вашага прэзідэнства, Францыя, радзіма барацьбы за свабоду і правы чалавека, будзе працягваць аказваць сваю грунтоўную падтрымку ўсім тым, хто змагаецца за свабоду і супраць несправядлівасці ва ўсім свеце”, - гаворыцца ў віншавальным лісце.

Аляксандр Мілінкевіч таксама падзякаваў за “падтрымку беларускіх дэмакратычных сіл па аднаўленні ў Беларусі дэмакратыі і вяртання краіны ў еўрапейскую сям`ю дэмакратычных нацыяў”.

Старшыня Палітрады дэмакратычных сіл Беларусі адзначыў, што з асаблівым пачуццём гонару ўзгадвае сустрэчу са Сп. Ніколя ў Марсэле на з’ездзе ЕРР:

-- Спадар Ніколя зрабіў на мяне вельмі вялікае ўражанне падчас нашай сустрэчы на з‘ездзе ЕРР у Марсэлі ў верасні мінулага году. Я тады зразумеў, што гэта палітык вельмі высокага ўзроўню. Я ганаруся нашым сяброўствам і высокім узроўнем нашых адносінаў.

Ніколя Сарказі заўсёды пільна сочыць за падзеямі ў Беларусі. Напярэдадні 25 сакавіка ён даслаў на маё імя ліст падтрымкі дэмакратычным сілам Беларусі, у якім ён адзначаў: “Хачу выказаць Вам, гэтак сама, і усім актывістам дэмакратычных сілаў Беларусі мае найлепшыя пажаданні. У Вашай цяжкай барацьбе за перамогу справядлівасці і дэмакратыі будзьце ўпэўненымі ў маёй самай поўнай падтрымцы. Спадзяючыся, што ў хуткім часе ў мяне будзе магчымасць сустрэцца з Вамі ў Мінску, выказваю Вам мае запэўніванні ў найвялікшай павазе”.

Думаю, што Францыя і новы прэзідэнт падтрымаюць цалкам тыя ўмовы, што выстаўляе Беларусі Еўрасаюз. Гэта добры шанец наладзіць супрацоўніцтва з Францыяй. Трэба рабіць крокі. І пешы крок вельмі просты – вызваліць палітвязняў.