Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Эстонскае консульства ў Менску не працуе 17:47, 07/05/2007
Генэральнае консульства Эстоніі ў Менску сёньня не працавала. Паводле консула Эрыка Сійгура, зь меркаваньняў бясьпекі дыпляматы ня могуць выйсьці з памяшканьня, калі на вуліцы ёсьць пікеты.
Сёньня некалькі дзясяткаў сяброў БРСМ і вэтэранскіх арганізацыяў зноў пікетавалі будынак генэральнага консульства Эстоніі. Яны пратэстуюць супраць пераносу помніка савецкаму салдату ў Таліне.
Паводле спадара Сійгура, пікетаваньне працягвалася і ў выходныя.
У суботу пікетоўцы вялі сябе агрэсіўна й спрабавалі адчыніць браму консульства. На месцы падзеяў не было міліцыі. У гэты ж дзень спадар Сійгур перадаў вусны пратэст у МЗС Беларусі з той нагоды, што беларускі бок не захоўвае гарантаванай бясьпекі.
Пакуль адказу ад беларускага боку няма.
Камэнтуючы “Радыё Свабода” падзеі вакол консульства, спадар Сійгур сказаў:
“Эстонскі бок выступае за свабоду меркаваньняў, нават калі яны адрозьніваюцца ад нашых ці іншых. Але ёсьць Венская канвэнцыя аб дыпляматычных дачыненьнях, дзе канкрэтна сказана пра абавязкі дзяржавы адносна дыпмісіяў і консульстваў. Яны павінны гарантаваць бясьпеку і спакой”.
