«Малады Фронт» гатовы да рэгістрацыі :: Хартыя'97 :: Навiны

У панядзелак у 15 гадзін у сядзібе Партыі БНФ у Менску адбудзецца ўстаноўчы сход арганізацыі “Малады Фронт”. Заўтра будзе афіцыйна абвешчаная дата судовага паседжаньня па справе сяброў “Маладога Фронту” Насты Палажанкі, Барыса Гарэцкага, Зьмітра Хведарука, Аляксея Янушэўскага й Алега Корбана, якіх вінавацяць ва ўдзеле ў незарэгістраванай арганізацыі.

На пытаньні “Польскага радыё” адказвае прэс-сакратар “Маладога Фронта” Барыс Гарэцкі:

-- Як справы з рэгістрацыяй “Маладога Фронту”?

-- У панядзелак у 15 гадзін у сядзібе БНФ на Варвашэні, 8 адбудзецца ўстаноўчы сход. Мы ўжо запрасілі прадстаўнікоў Міністэрства юстыцыі. Адразу пасьля ўстаноўчага сходу панясём дакумэнты на рэгістрацыю. На ўстаноўчым сходзе будуць прысутнічаць амбасадары замежных краінаў, журналісты.

-- Ці ўдзельнічалі ў складаньні дакумэнтаў, патрэбных для рэгістрацыі, юрысты?

-- Дакумэнты рэдагаваліся юрыстамі праваабарочага цэнтру “Вясна”, БХК, а таксама юрыстамі беларускага прадстаўніцтва АБСЭ. Паводле іх меркаваньня, арганізацыя павінна быць зарэгістраваная.

-- Калі арганізацыя “Малады Фронт” будзе зарэгістраваная, дык крымінальная справа супраць сяброў павінна быць аўтаматычна спыненая?

-- У Крымінальным кодэксе ў артыкуле 193-м ёсьць фармулёўка пра тое, што пазбаўляюцца адказнасьці па гэтым артыкуле актывісты арганізацыі, якія дзейнічалі з мэтаю зарэгістраваць арганізацыю. Менавіта гэта мы й робім. Мы ня мусім падпадаць пад гэты артыкул.

-- Якія апошнія навіны наконт допытаў?

-- У сераду былі дапытаныя 7 актывістаў салігорскай арганізацыі. 4 траўня была дапытаная ўся адміністрацыя сярэдняй школы, у якой вучыцца наш актывіст Іван Шыла. Камітэт Дзяржбясьпекі задаваў тыя самыя пытаньні па ўдзеле Івана ў “Маладым Фронце”. Бачна, што ўзбуджаецца чарговая крымінальная справа. На допытах людзям так і кажуць: мы зьбіраем матэрыял на чарговую справу.