Расейская кампанія можа перакрыць трубу ў Беларусі :: Хартыя'97 :: Навiны

У Бешанковіцкім раёне Віцебскай вобласці працягваюцца працы па ліквідацыі аварыі на расейскім магістральным нафтапрадуктаправодзе "Унеча – Вентспілс", якая адбылася раніцай 5 траўня. “Інтэрфакс” сёння паведаміў, што "Захад-Транснафтапрадукт" можа вывесці з эксплуатацыі дадатковае адгалінаванне трубаправода "Унеча–Вентспілс".

Нагадаем, што ў выніку прарыву нафтаправода выцекла блізу пяці тон нафтапрадуктаў, забруджанай апынулася тэрыторыя плошчай каля 50 квадратных метраў. Частка нафтапрадуктаў патрапіла ў меліярацыйны канал, які звязаны з ракой Свячанкай – прытокам рэкі Улы, якая ўпадае ў Заходнюю Дзвіну.

Гэта ўжо другая аварыя на нафтаправодзе "Унеча – Вентспілс": першая адбылася 23 сакавіка. Тады з трубы выцекла каля 120 тон дызпаліва, частка якога патрапіла ў Заходнюю Дзвіну і дабралася да Латвіі. Выдаткі МНС Беларусі на ліквідацыю той аварыі склалі 136 млн. рублёў, а сума агульнай шкоды не названая дагэтуль.

Як паведаміў БелаПАН прэс-сакратар МНС Беларусі Віталь Навіцкі, пакуль складана прагназаваць тэрміны завяршэння прац па ліквідацыі наступстваў учорашняй аварыі. Ён толькі нагадаў, што мінулым разам працы вяліся каля месяца.

Цяпер у пазбяганне трапляння нафтапрадуктаў у Заходнюю Дзвіну перакрытыя (засыпаныя пяском) усе меліярацыйныя каналы, размешчаныя ў радыусе 600 метраў ад месца аварыі. Шкоду маецца ацаніць Міністэрству прыроды і аховы навакольнага асяроддзя.

Па папярэдніх дадзеных, прычынай цяперашняга прарыву нафтаправода, як і ў мінулы раз, стала яго зношанасць. Глыбіня залягання нафтаправода – 1,2 метра, дыяметр – 377 міліметраў, працоўны ціск у трубе – 40 атмасфер. Уладальнік нафтаправода – расейскае прадпрыемства “Захад-Транснафтапрадукт”.