КДБ: Плаціць выкуп за выкрадзеную ў Нігерыі ўраджэнку Беларусі нельга :: Хартыя'97 :: Навiны

За беларускую грамадзянку Ірыну Экпа-Ума, выкрадзеную ў Нігерыі, нельга плаціць выкуп, лічыць начальнік антытэрарыстычнага цэнтра КДБ Беларусі Алег Чарнышоў. "Ёсць выпадкі, калі пасля атрымання выкупу выкрадзенага чалавека вяртаюць, такія выпадкі былі, напрыклад, у Чачэніі, але гэта спараджае наступныя злачынствы такога роду", – заявіў ён "Інтэрфаксу" ў аўторак.

"Варта заплаціць адзін раз, і гэтыя рэчы пачынаюць разрастацца лавінападобна", – дадаў суразмоўца агенцтва. Ён таксама лічыць, што брату Ірыны Экпа-Ума не варта ехаць у Нігерыю. "У прамыя перамовы яму ўступаць няма ніякага сэнсу. Іх вядуць прафесіяналы, якія разумеюць, чым яны рызыкуюць", – сказаў спецыяліст. "У адваротным выпадку давядзецца плаціць за двух чалавек замест аднаго", – дадаў ён.

Начальнік антытэрарыстычнага цэнтра таксама лічыць, што кампанія, дзе працуе выкрадзеная, паступае правільна, не выдаючы свае дзеянні. "Ідуць карпатлівыя перамовы і любыя публічныя дзеянні могуць іх істотна ўскладніць", - сказаў ён. Па словах суразмоўцы агенцтва, Нігерыя не знаходзіцца "ў першай пяцёрцы" краін, дзе квітнеюць выкраданні людзей для атрымання выкупу. "Тым не менш, у Нігерыі выпадак з беларускай грамадзянкай - далёка не першы, калі за вызваленне замежнікаў патрабавалі выкуп", - адзначыў ён. "Любая краіна, дзе нестабільная палітычная сітуацыя, асабліва ў Афрыцы, схільная да гэткай заганы”, - сказаў спецыяліст. Пры гэтым ён запэўніў, што сітуацыя з І.Экпа-Ума знаходзіцца "на кантролі". "Тое, што дзеянні адпаведных структур не транслююцца па тэлебачанні, не значыць, што нічога не адбываецца", - заявіў А.Чарнышоў.