У Дзень Перамогі арыштоўвалі за віншаваньне ветэранаў :: Хартыя'97 :: Навiны

9 траўня падчас святкаваньня Дня Перамогі ў Менску былі затрыманыя актывісты моладзевых дэмакратычных арганізацыяў. Сябры ініцыятывы “Новы шлях” віншавалі вэтэранаў у менскім парку Горкага. Яны раздавалі ім паштоўкі з улёткамі, у якіх заклікалі падтрымаць моладзь, што адстойвае дэмакратычныя каштоўнасьці.

У паштоўках былі маленькія ўлёткі, у якіх, у прыватнасьці, напісана: “Цяпер, калі ўлада прымае законы, скіраваныя супраць беларускага народу, каб пазбавіць нас законных ільготаў, магчымасьці нармальна працаваць і зарабляць, мы мусім абараніць тое, што нам гарантавана дзейнымі законамі і Канстытуцыяй”.

Аўтары заклікалі вэтэранаў падтрымаць моладзь. Вэтэраны дзякавалі за віншаваньне. Некаторыя станоўча рэагавалі на зьмест улётак.

“Мы прыйшлі, каб павіншаваць вэтэранаў у гэтае вялікае сьвята і нагадаць ім, што ў нашай краіне парушаюцца правы чалавека, што гэты рэжым вельмі нагадвае Нямеччыну 1937 году. Прыйшлі, каб падзякаваць вэтэранам за тое, што яны ўратавалі сьвет і нашу краіну, у якой мы спадзяемся пабудаваць сапраўднае дэмакратычнае грамадзтва”, -- патлумачыла “Свабодзе” мэту акцыі ўдзельніца акцыі Крысьціна.

Супрацоўнікі міліцыі Ленінскага раёну падышлі да маладых людзей, калі ў тых ужо не засталося ніводнай улёткі. Маладыя людзі прадэманстравалі міліцыянтам толькі паштоўку.

Супрацоўнікі міліцыі параіліся са сваім кіраўніцтвам і выклікалі па рацыі спэцназаўцаў, каб тыя даставілі пяцярых актывістаў арганізацыі ў пастарунак. Але тыя зь нейкіх прычынаў не маглі хутка прыйсьці на месца затрыманьня.

На заўвагі мінакоў, чаму не затрымліваюць падлеткаў нападпітку, якія нясуць бутэлькі зь віном, міліцыянты казалі, што маюць больш важны клопат. Потым яны перапісалі ў юнакоў пашпартныя зьвесткі й сышлі.

Таксама ўчора ў цэнтры Менску пасьля сьвяточнага салюту супрацоўнікі міліцыі затрымалі актывістаў моладзевага дэмакратычнага руху 19-гадовага Ільлю Шарбінскага і 17-гадовага Рамана Багдановіча.

Паводле хлопцаў, хутчэй за ўсё яны забралі ўвагу міліцыянтаў тым, што мелі на вопратцы значкі “За свабоду!”. Ільлю Шарбінскага і Рамана Багдановіча міліцыянты даставілі ў міліцыю Цэнтральнага раёну Менску.

Хлопцы паведамілі “Радыё Свабода”, што былі сьведкамі таго, як п’яныя маладзёны пасьля сьвяточнага салюту хуліганілі, зрывалі афіцыйныя сьцягі Рэспублікі Беларусь, кідалі іх на зямлю і ў Сьвіслач.