Беларускія дзеці будуць лячыцца ў Італіі пад кантролем :: Хартыя'97 :: Навiны

Падпісанне дамовы аб аздараўленні беларускіх дзяцей у Італіі з`яўляецца асновай для развіцця стасункаў паміж дзвюма краінамі, заявіў журналістам у Менску пасля падпісання дамовы Генеральны дырэктар МЗС Італіі па пытаннях італьянцаў за мяжой і міграцыйнай палітыцы, амбасадар Адрыяна Бенэдэцці. У сваю чаргу міністр адукацыі Беларусі Аляксандр Радзькоў падкрэсліў, што з падпісаннем дадзенай дамовы беларускія дзеці, якія выязджаюць на аздараўленне ў Італію, набылі там "афіцыйны статус "грамадзянін Беларусі", раней жа ў іх быў у Італіі статус "безнаглядных".

"Дамова – добрая аснова для развіцця беларуска-італьянскіх стасункаў у галіне адукацыі, культуры, палітыкі. Гэта вельмі важная дамова, і яна з`яўляецца гарантыяй развіцця стасункаў паміж дзвюма краінамі", – заявіў прадстаўнік МЗС Італіі.

Ён таксама ўдакладніў, што цягам апошніх дваццаці гадоў у Італіі прайшлі аздараўленне больш за 200 тыс. беларускіх дзяцей.

У сваю чаргу міністр адукацыі Беларусі Аляксандр Радзькоў падкрэсліў, што з падпісаннем дадзенай дамовы беларускія дзеці, якія выязджаюць на аздараўленне ў Італію, набылі там "афіцыйны статус "грамадзянін Беларусі", раней жа ў іх быў у Італіі статус "безнаглядных". "Улічваючы гэты статус, італьянскія суды маглі прымаць любыя рашэнні ў дачыненні беларускіх дзяцей. Цяпер, пасля падпісання дамовы, Італія будзе афіцыйна прызнаваць новы статус беларускіх дзяцей, якія выязджаюць на аздараўленне, і будзе пры прыняцці рашэнняў кіравацца палажэннямі новай дамовы", – падкрэсліў міністр. Пры гэтым ён паведаміў, што "новая дамова дазволіць беларускаму боку здзяйсняць кантроль і консульскі нагляд за тым, у якіх умовах пражываюць беларускія дзеці, якія выязджаюць на аздараўленне ў Італію, дзе яны жывуць, з кім маюць узаеміны".

Па словах Радьзкова, "цяпер, пасля падпісання дамовы, аздараўленне беларускіх дзяцей у Італіі будзе знаходзіцца пад кантролем беларускага ўрада".

Наконт пытанняў усынаўлення беларускіх дзяцей замежнікамі, міністр паведаміў, што цяпер на разглядзе знаходзіцца 50 спраў, з якіх 37 аб усынаўленні беларускіх дзяцей італьянскімі сем`ямі.