Еўрапарламент: У Расеі не атрымалася раскалоць Еўропу :: Хартыя'97 :: Навiны

Дэпутаты Еўрапарламента заяўляюць, што ў Расеі не атрымаецца раскалоць Еўропу з прычыны расейска-эстонскага канфлікту. Пра гэта дэпутаты з розных парламенцкіх груп казалі 9 траўня ўвечары падчас абмеркавання ходу падрыхтоўкі да саміту Расея–ЕЗ, запланаванага на 18 траўня.

"Гэта была сапраўдная атака на суверэннасць адной з краін-сябраў ЕЗ, але Расея не павінна лічыць, што такімі паводзінамі ў яе атрымаецца падзяліць ЕЗ", – заявіў лідэр найбуйнейшай дэпутацкай групы Еўрапарламента – групы народных партый Жазэф Доль (Францыя).

Ён таксама адзначыў, што цяпер – не час “халоднай вайны”, а таму Еўракамісія і Рада ЕЗ мусяць распрацаваць спецыяльную стратэгію супрацоўніцтва з Расеяй. Прадстаўнік групы сацыялістычных партый Ян-Марынус Вірсма (Нідэрланды) адзначыў непрымальнасць паўтору такіх акцый, як супраць Эстоніі. А лідэр групы ліберальных партый Грэхем Уотсан выказаў нават перакананне ў тым, што трэба адкласці правядзенне саміту Расея–ЕЗ, адзначыўшы, што яго група будзе галасаваць за гэта падчас сённяшняга прыняцця рэзалюцыі па Расеі.

"Дыялог – гэта вельмі важна, але дыялог – гэта не два маналогі... Прадстаўнікі Рады Еўропы і Еўракамісіі сказалі добрыя словы, але ім бракуе жорсткасці. Трэба адкласці саміт, пакуль Расея не захоча размаўляць мовай дэмакратыі", – сказаў ён. Прадстаўнік групы "зялёных" Даніэль Кон-Бендыт (Нямеччына) адзначыў, што Расея – гэта не СССР, хоць у шматлікіх пытаннях яна прэтэндуе на палітыку СССР – палітыку магутнасці, не столькі вайсковай, колькі эканамічнай і, у прыватнасці, энергетычнай.

"Мы павінны мець стасункі з Расеяй, але мы таксама павінны мець стасункі з Саудаўскай Аравіяй, але гэта не значыць, што мы прызнаем, што Саудаўская Аравія, у якой варам адсякаюць руку, рухаецца ў правільным кірунку", – заявіў дэпутат. Прадстаўнік групы аб`яднаных левых Мека Сепанен (Фінляндыя) адзначыў, што ЕЗ не можа дазволіць падзелу Еўропы, адзначыўшы, што часам гэта адбываецца на практыцы. "Гэта часам адбываецца, і, што абсалютна непрымальнае, з боку некаторых краін ЕЗ, якія спрабуюць будаваць больш прывілеяваныя стасункі з Расеяй", – сказаў прадстаўнік левых.

Прадстаўнік групы правых партый Браян Кроле (Вялікабрытанія) адзначыў, што цяпер у Расеі назіраецца новая форма аўтарытарызму, якая выяўляецца, у тым ліку, у нападзе на амбасаду Эстоніі ў Маскве, у выкарыстанні энергетыкі з мэтай прымусіць падпарадкавацца жаданням Расеі. "Мы павінны прадэманстраваць грамадзянам Эстоніі, што яны не пакінутыя, што яны з`яўляюцца грамадзянамі Еўропы", – падкрэсліў дэпутат.

Саміт Расея–ЕЗ запланаваны на 18 траўня ў Самары. Пасля абвастрэння сітуацыі вакол эстонскай амбасады ў Маскве, у Еўразвязе абмяркоўвалі магчымасць перанясення саміту на пазнейшую дату – да ўрэгулявання эстонска-расейскага крызісу, паведамляе агенцтва “УНИАН”.