Беларускім НПЗ бракуе нафты :: Хартыя'97 :: Навiны

Беларускаму ААТ "Мазырскі НПЗ" у траўні бракуе 200 тысяч тон нафты з прадугледжаных паліўным балансам “саюзнай дзяржавы” аб`ёмаў на пастаўку чыгуначным транспартам для выканання даручэння ўрада аб поўнай загрузцы магутнасцяў расейскай нафтай, паведаміў ПРАЙМ-ТАСС прадстаўнік адміністрацыі прадпрыемства.

Ён нагадаў, што ўрад запатрабаваў ад беларускіх НПЗ забяспечыць, пачынаючы з траўня, не толькі выкананне балансу нафтавай сыравіны “саюзнай дзяржавы” Беларусі і Расеі, але і нагнаць адставанне ад графіка паставак расейскай нафты. "Толькі ў гэтым выпадку Беларусь здолее ў поўным аб`ёме аднавіць экспарт беларускай нафты, на чым настойвае ўрад", – сказаў суразмоўца.

Па яго словах, выканаць гэтае даручэнне вельмі складана. "Пастаўкі нафты па трубе абмежаваныя балансам, а кошт нафты нашмат, якая пастаўляецца па чыгунцы, вышэйшы за кошт "трубнай" нафты", – растлумачыў прадстаўнік завода.

Цягам студзеня–сакавіка гэтага года чыгуначным транспартам у Беларусь пастаўленыя толькі 478 тыс. Тон нафты (49% ад плана), трубаправодным транспартам – 3,645 млн. тон (83% ад плану). "Расейскія кампаніі выяўляюць гатоўнасць павялічыць пастаўкі нафты па чыгунцы, аднак пры гэтым настойваюць на павелічэнні прэміі для кампаній", – канстатаваў суразмоўца.

Па яго словах, каб выканаць планавыя заданні, у траўні Мазырскаму НПЗ не хопіць 200 тысяч тон "калёснай" нафты. Як будзе папоўнены гэты дэфіцыт, пакуль невядома. У той самы час урад настойвае, каб НПЗ працавалі з стоадсоткавай загрузкай – 31 тыс. тон нафты ў суткі.
Паводле інфармацыі, атрыманай у органах дзяржкіравання, у канцы красавіка прадстаўнікі Мазырскага НПЗ планавалі выехаць у Азербайджан, каб дамовіцца наконт паставак па чыгунцы азербайджанскай нафты. Аднак разлікі паказалі немэтазгоднасць такіх паставак з прычыны больш высокай цаны.

Баланс нафтавай сыравіны ў 2007 г прадугледжвае пастаўку на беларускія НПЗ 21,5 млн. тон расейскай нафты. У тым ліку трубаправодным транспартам павінны быць пастаўленыя 17,6 млн. тон, чыгуначным транспартам – 3,9 млн. тон.

Невыкананне нафтавага балансу “саюзнай дзяржавы” абумоўленае ўвядзеннем новых правіл паставак расейскай нафты на беларускія НПЗ у 2007 г. Рэзкі спад паставак нафты назіраўся ў студзені, калі трубаправодным транспартам было пастаўлена 47% ад плану, а чыгуначным – 43% ад плану. Гэтая сітуацыя была выкліканая ўвядзеннем РФ з 1 студзеня 2007 года мытнай пошліны на нафту ў памеры 180,7 дал/т. Беларускі бок адмовіўся закупляць нафту па такой цане.

У выніку з 1 па 12 студзеня расейская нафта не паступала ў Беларусь з прычыны адсутнасці кантрактаў. Пастаўкі былі адноўленыя з 13 студзеня, пасля дасягнення дамоўленасцяў па ўмовах пастаўкі нафты. Аднак нягледзячы на неаднаразовыя прапановы беларускага боку расейская "Транснафта" не папоўніла недапастаўленыя на пачатку студзеня аб`ёмы, спаслаўшыся на неабходнасць выканання экспартных кантрактаў.