Азербайджанскай нафты ў Беларусі будзе няшмат :: Хартыя'97 :: Навiны

Паводле ацэнкі спецыялістаў, гадавыя аб’ёмы здабычы Беларуссю нафты ў Азербайджане могуць быць дастаткова невялікімі, паведамляе БелТА, і дадае, што і гэта ўнясе “значны ўклад” у гарантаванне беларускай энергабяспекі.

"Беларуснафта" працягвае абмеркаванне з Баку магчымых варыянтаў супрацоўніцтва па сумеснай распрацоўцы нафтавых радовішчаў, паведаміў агенцтву намеснік генеральнага дырэктары па геалогіі аб`яднання Валеры Бескапыльны.

Нагадаўшы, што Менскам раней атрыманыя "прапановы па ўдзеле ў распрацоўцы азербайджанскіх радовішчаў", ён адзначыў, што пакуль рана казаць пра пэўныя радовішча і магчымую долю беларускага боку.

"Усё ў працэсе перамоваў", – сказаў В.Бескапыльны.

Цяпер бакам неабходна ацаніць эканамічную эфектыўнасць сумесных праектаў. Гаворка ідзе пра магчымы беларускі удзел у радовішчах на тэрыторыі Азербайджана, якія ўжо распрацоўваюцца, з выкарыстаннем тэхналогій, якія ўжываюць беларускія спецыялісты: метадаў падвышэння нафтааддачы пластоў і інш.

Гэты самы метад – падвышэння нафтааддачы пластоў, дарэчы, прыцягнуў і іранскіх нафтавікоў. На мінулым тыдні Тэгеран ухваліў прадстаўлены "Беларуснафтай" генплан распрацоўкі нафтавага радовішча Джафейр, магутнасць якога, па папярэдніх ацэнках, складзе каля 30 тыс. барэляў у дзень. Справа за "малым" – фінансаваннем.

Паводле інфармацыі «Белорусских новостей», для рэалізацыі праекту Беларусь збіраецца прыцягнуць інвестыцыі в`етнамскай дзяржаўнай нафтагазавай кампаніі Petrovietnam, якая, накшталт, згодна цалкам аплаціць беларускія выдаткі ў Іране, пры ўмове стварэння на парытэтных з "Беларуснафтай" пачатках сумеснага прадпрыемства.

Для гэтага, зрэшты, яшчэ неабходна атрымаць згоду іранскага боку. Хутчэй за ўсё, пытанне будзе абмяркоўвацца падчас знаходжання прэзідэнта Ірана Махмуда Ахмадзінежада ў Беларусі.

А гэта адбудзецца ўжо ў самыя блізкія два тыдні.