Дзяржава будзе субсідаваць перапрацаўнікоў нафты :: Хартыя'97 :: Навiны

Беларусь усталёўвае для нафтаперапрацоўчых заводаў (НПЗ) і расейскіх кампаній, якія пастаўляюць нафту ў краіну на давальніцкіх умовах, дзяржаўныя субсідыі на ўзроўні 90 % ад стаўкі экспартнай пошліны на ўвазную ў краіну нафту. Як паведаміла ПРАЙМ-ТАСС крыніца ў органах дзяржаўнага кіравання, адпаведны ўказ быў падпісаны 4 траўня.

Паводле дакумента, субсідыя будзе падавацца перапрацаўнікам нафты, якія пастаўлялі ў краіну нафту, пачынаючы з красавіка. Плануецца, што субсідыі будуць падавацца да 1 ліпеня. Потым мяркуецца выпрацаваць новы механізм забеспячэння паставак сыравіны на НПЗ.
Як раней паведамлялася, да 1 ліпеня плануецца завяршыць працэс стварэння Беларускай нафтавай кампаніі – дзяржаўнай структуры, якая будзе займацца закупам нафты і рэалізацыяй нафтапрадуктаў. Пры гэтым мяркуецца захаваць давальніцкую нафтаперапрацоўку датуль, пакуль Беларуская нафтавая кампанія не запрацуе ў поўную сілу.

Паводле ацэнках экспертаў, увядзенне дзяржаўных субсідый у памеры 90% ад стаўкі ўвазной пошліны на нафту наўрад ці істотна падвысіць рэнтабельнасць перапрацоўкі, бо ўжо з 1 чэрвеня будуць значна падвышаныя пошліны на расейскую нафту. Экспартная пошліна на нафту ў Расеі складзе 200,6 даляра за тону супраць дзейнай цяпер стаўкі пошліны ў 156,4 даляра. Вывазная пошліна на светлыя нафтапрадукты з 1 чэрвеня складзе 147,5 даляра за тону супраць 117,7 даляраў цяпер, а на цёмныя нафтапрадукты – 79,4 даляра супраць 63,4 даляра за тону.

Беларусь і Расея 12 студзеня падпісалі міжурадавае пагадненне аб мерах па ўрэгуляванні гандлёва-эканамічнага супрацоўніцтва ў галіне экспарту нафты і нафтапрадуктаў.

Гэтым пагадненнем Расея і Беларусь вызначылі стаўкі экспартнай пошліны на расейскую нафту, якая пастаўляецца ў Беларусь. Стаўка пошліны ў 2007 годзе будзе разлічвацца з ужываннем каэфіцыента ў памеры 0,293 ад стаўкі мытнай пошліны на сырую нафту, якая вывозіцца ў далёкае замежжа. Гэта значыць пры цяперашняй стаўцы пошліна на нафту, якая пастаўляецца ў Беларусь, складае каля 45,8 даляра за тону. Беларусь таксама ўзяла на сябе абавязальніцтва па павелічэнні вывазных мытных пошлін на нафту і нафтапрадукты да расейскага ўзроўню.

У 2006 годзе давальніцкая перапрацоўка нафты расейскімі кампаніямі складала ў Беларусі больш як 50%. Для падвышэння прывабнасці давальніцкай перапрацоўкі з 1 лютага гэтага года былі ўведзеныя дзяржаўныя субсідыі для пастаўшчыкоў нафты ў памеры 24 даляра за тону, пры тым, што эксперты казалі пра неабходнасць пакрыцця 90% ад стаўкі мытнай пошліны на нафту.