Мы аплочваем прывольнае жыццё БРСМаўцаў? :: Хартыя'97 :: Навiны

Віцебскі гарвыканкам замовіў 27-мі прадпрымальнікам абласнога цэнтру даваць усе выгоды сябрам праўладнага Саюзу моладзі. З прадпрымальнікамі нават заключылі адпаведныя дамовы, паводле якіх уладальнікам білетаў чальцоў БРСМ прадугледжаныя адпаведныя зьніжкі.

Напрыклад, прыватны прадпрымальнік Янчанка даў згоду перавозіць прапрэзыдэнцкіх маладзёнаў на 10% таньней у гарадзкім і прыгарадным транспарце. А ў цырульні "Галісіма" зробяць зьніжку на 20% за сьвяточную прычоску маладой модніцы альбо паголяць пушок юнака. На 10% выгодней будзе адрамантаваць зьбітыя чаравікі ў "Абцасіку" вядомага ў горадзе ўладальніка шаўцовых майстэрняў Атаджыняна. Больш сьціплыя грошы аддадуць чальцы БРСМ ў фотасалёнах, інтэрнэт-клюбах, рамантуючы мабільныя тэлефоны... І нават грузаперавозкі ім абыйдуцца значна таньней. Гэткія ільготы дазваляюць ня толькі ашчадзіць невялікія грошы студэнтам ці школьнікам, але й хутчэй разгортаваць найбольш хваткім БРСМаўцам свой пачатковы бізнэс, паведамляе “Радыё Рацыя”.

Прадпрымальнікі, безумоўна, не рваліся, каб дапамагаць маладым прыстасаванцам, але й сварыцца з гарадзкімі ўладамі сэнсу ня бачаць.

Тое, што гэткія захады робяцца з адной мэтай — прыцягнуць як мага больш юнакоў і дзяўчынак у дзяржаўную арганізацыю — ніхто асабліва й не хавае. Зараз па закліку ідэолягаў на навабудоўлі альбо ў раёны, забруджаныя пасьля Чарнобыльскай катастрофы, сучасных "камсамольцаў" дручкамі не пазаганяць. Таму й выдумляюць спакусьлівыя магчымасьці, каб падвысіць колькасныя лічбы шэрагаў "маладзёвага авангарду". Як, напрыклад, у Віцебскім дзяржаўным унівэрсытэце, дзе сярод тых, хто падаваў заяву на ўступ у чальцы арганізацыі, разыгрывалі слухаўкі. Жадаючых было багата.

Чыноўнікаў ад улады не бянтэжыць, што зараз, калі паўстала пытаньне, каб пазбавіць апошніх ільготаў самыя безабаронныя пласты насельніцтва, у тым ліку нават вэтэранаў Другой Сусьветнай вайны, прынаджваньне маладых прыстасаванцаў выглядае ня вельмі маральна.