У Беларусі не будзе расейскага рубля :: Хартыя'97 :: Навiны

Пакуль не будуць створаныя роўныя ўмовы для суб’ектаў гаспадарання Беларусі і Расеі, падстаў для стварэння валютнага саюза паміж дзвюма краінамі няма. Пра гэта 10 траўня на прэс-канферэнцыі ў Менску заявіў старшыня праўлення Нацыянальнага банка Беларусі Пётр Пракаповіч. Па яго словах, увядзенне расейскага рубля – гэта пытанне не да цэнтральных банкаў, а да ўрадаў дзвюх краін. "Найперш да расейскага ўрада, які сышоў ад дамоўленасцяў, прадугледжаных у сумесным плане ўрадаў і цэнтрабанкаў дзвюх дзяржаў. У гэтым плане было прадугледжанае стварэнне роўных умоў для суб`ектаў гаспадарання і насельніцтва, у тым ліку роўных цэнаў на энерганосьбіты", – падкрэсліў галоўны банкір Беларусі. П.Пракопавіч адзначыў, што адыход расейскага боку ад гэтага асноватворнага прынцыпу ўвядзення адзінай валюты адсунуў рашэнне пытання на нявызначаны час.

"Мы не супраць пераходу на рынкавыя стасункі і цэны, у тым ліку на энергарэсурсы. Але павінны рабіць гэта адначасова, з падвышэннем цэнаў у Расеі", – лічыць П.Пракопавіч.

Кіраўнік Нацбанку таксама заявіў, што ўсе ключавыя пытанні стварэння валютнага саюза з Расеяй былі вырашаныя яшчэ ў 2003 годзе. Аднак тады з Расеяй не атрымалася ўзгадніць пытанне падавання Беларусі стабілізацыйнага крэдыту ў аб`ёме 2 млрд. даляраў тэрмінам на тры гады для аказання падтрымкі беларускай эканоміцы ў пераходны перыяд. Гэта, на думку П.Пракопавіча, гаворыць пра тое, што "мяч па-ранейшаму на расейскім боку".

Супрацоўніцтва Нацбанку Беларусі з Цэнтрабанкам Расеі застаецца на ранейшым узроўні, заявіў П.Пракопавіч. "Ніякія фактары, у тым ліку падвышэнне цэнаў на энерганосьбіты, не адбілася на стасунках з Цэнтрабанкам. У нас наладжаныя прадуктыўныя стасункі, якія маюць мэтай усяляк садзейнічаць павелічэнню таваразвароту паміж краінамі", – падкрэсліў кіраўнік Нацбанку.

П.Пракопавіч таксама паведаміў, што чарговае паседжанне Міжбанкавага валютнага савета Беларусі і Расеі адбудзецца 24–26 траўня ў Менску.