У статут БХК занесеныя змены :: Хартыя'97 :: Навiны

Міністэрствам юстыцыі 8 траўня зарэгістраваныя змены і дадаткі, унесеныя ў Статут Беларускага Хельсінкскага Камітэта. Выдадзенае сведчанне аб дзяржаўнай рэгістрацыі грамадскага аб`яднання. Цяперашняя рэдакцыя Статуту прыведзеная ў адпаведнасць з нормамі дзейнага заканадаўства аб грамадскіх аб`яднаннях. У назву аб`яднання занесенае азначэнне характару яго дзейнасці – Рэспубліканскае праваабарончае грамадскае аб`яднанне «Беларускі Хельсінкскі Камітэт».

На прапанову Міністэрства юстыцыі ў статут былі занесеныя таксама некаторыя рэдакцыйныя праўкі.

Мэтай РПГА «Беларускі Хельсінкскі Камітэт» з`яўляецца ахова ў Беларусі правоў чалавека, гарантаваных Канстытуцыяй Рэспублікі Беларусь, дзейным заканадаўствам, а таксама дэклараваных Хельсінкскімі пагадненнямі, іншымі міжнароднымі дамовамі аб правах чалавека, інфармаванне грамадскасці аб сітуацыі з правамі чалавека ў Беларусі і свеце.

Аб`яднанне захавала права абараняць ва ўсталяваным законам парадку правы і законныя інтарэсы асоб, якія лічаць, што іх правы парушаныя, і якія звярнуліся ў РПГА «БХК», у судах, дзяржаўных, гаспадарчых, грамадскіх органах і арганізацыях.

На чарговым паседжанні Рады аб`яднання 3 траўня 2007 здаволеная заява Гары Паганяйлы аб яго адстаўцы з пасады намесніка старшыні. Далей ён будзе кіраваць прававой камісіяй РПГА «Беларускі Хельсінкскі Камітэт». Выканаўцам абавязкаў намесніка старшыні абраны Алег Гулак. Выканаўчым дырэктарам РПГА «Беларускі Хельсінкскі Камітэт» прызначаная Таццяна Гацура.