Студэнты БДУ працягваюць збіраць подпісы супраць адмены льгот :: Хартыя'97 :: Навiны

Студэнты гістарычнага факультэта БДУ з сваёй ініцыятывы пачалі збор подпісаў супраць адмены льготы на праезд для студэнтаў. Цягам тыдня збор праходзіў каля галоўнага корпуса БДУ, а таксама каля юрыдычнага, геаграфічнага, механіка-матэматычнага факультэтаў і факультэта журналістыкі. Таксама подпісы збіраліся каля галоўных карпусоў БНТУ, БАТУ, ІМГЛУ. Збор подпісаў праходзіў у прысутнасці назіральнікаў з Беларускага Хельсінкскага камітэта.

Як адзначае адзін з зборшчыкаў подпісаў, сябра Аб`яднанай грамадзянскай партыі Сяргей Чайка, студэнты не толькі актыўна падпісваліся пад патрабаваннем, але і адкрыта выказвалі сваё абурэнне дзеяннямі ўлад. Студэнтаў падтрымлівалі шматлікія выкладчыкі. Такім чынам, сіламі шасці студэнтаў гістарычнага факультэта былі сабраныя больш як 3 тысячы подпісаў. Подпісы будуць перададзеныя ў Адміністрацыю прэзідэнта і “палату прадстаўнікоў”. Акрамя таго, як нагадаў Сяргей Чайка, на 20 траўня пададзеныя заяўкі на правядзенне мітынгу на плошчы Бангалор супраць адмены льгот.

На гэтым тыдні моладзевыя актывісты пачнуць накіроўваць у “парламент” подпісы супраць адмены льгот, паведамляе прэс-служба АГП.

Пачаць накіроўваць подпісы планавалася яшчэ на мінулым тыдні. "Але ў нас узніклі тэхнічныя складанасці. Мы спрабавалі запісацца на прыём да спікера “палаты прадстаўнікоў” Уладзіміра Канаплёва. Аднак ужо трэці раз нам кажуць, што сустрэча немагчымая з прычыны яго вялікай занятасці", – паведаміла БелаПАН выканаўчая дырэктарка рэспубліканскага праваабарончага грамадскага аб`яднання "Беларускі Хельсінкскі Камітэт" (БХК), старшыня камісіі па правах моладзі, якая навучаецца, БХК Таццяна Гацура.

Не атрымоўваецца сустрэцца і з рэктарам Белдзяржуніверсітэта Васілём Стражавым, паведаміла Т.Гацура. "Мы спрабавалі сустрэцца з ім для таго, каб атрымаць дазвол на збор подпісаў у дворыку універсітэта. Аднак рэктар БДУ ўвесь час заняты. Накшталт нас быў згодны прыняць прарэктар гэтага ВНУ Уладзімір Сувораў, але патэлефанаваў начальнік аддзела па выхаваўчай працы БДУ Павел Скалабан і паведаміў, што наша сустрэча "немэтазгодная", – паведаміла Т.Гацура.

Але самая парадаксальная сітуацыя, па словах Т.Гацуры, мела месца ў Адміністрацыі прэзідэнта. "Мы накіравалі туды больш за 120 персанальных зваротаў студэнтаў да прэзідэнта Беларусі з просьбай захаваць льготы для студэнтаў. Калі я спрабавала высветліць лёс гэтых зваротаў, мне заявілі, што яны "страціліся". У сувязі з гэтым БХК рыхтуе заявы ў Раду бяспекі і Камітэт дзяржбяспекі Беларусі", – заявіла Т.Гацура.

Тым не менш, як паведаміла старшыня камісіі па правах моладзі, якая навучаецца, БХК, студэнты, хто збірае подпісы супраць адмены льгот, знаходзяць разуменне ў некаторых дэпутатаў “палаты прадстаўнікоў”. "Напрыклад, дастаткова добрыя стасункі ў нас з Валянцінай Гашко. Яна паведаміла, што “дэпутаты” яшчэ ўносяць папраўкі ў законапраект аб адмене льгот, але прапаноў аб адмене 50-адсоткавай скідкі на праезд студэнтам яшчэ не паступала. Мы будзем прапрацоўваць гэтае пытанне", – адзначыла Т.Гацура

Яна паведаміла, што студэнты БДУ звярнуліся ў прафсаюз з патрабаваннем абараніць іх права і выказаць пратэст у сувязі з зменамі ў заканадаўства, якія рыхтуюцца. Старшыня прафсаюза БДУ Ніна Радзевіч паабяцала студэнтам, што ў “палату прадстаўнікоў” будзе накіраваны ліст з просьбай перагледзець законапраект на карысць моладзі, якая навучаецца.

"Але нас асабліва радуе Беларускі рэспубліканскі саюз моладзі. Яны ахвотна ідуць на кантакт, з задавальненнем з намі сустракаюцца. Праўда, практычнай карысці ад гэтых сустрэч пакуль няма, але я спадзяюся, што сітуацыя зменіцца неўзабаве", – адзначыла Т.Гацура.