Урад няправільна ацэньвае сітуацыю ў эканоміцы? :: Хартыя'97 :: Навiны

Намеснік кіраўніка Адміністрацыі прэзідэнта Беларусі Леанід Анфімаў лічыць, што ўрад не распачаў неабходных мер па мінімізацыі наступстваў для эканомікі росту цэнаў на энергарэсурсы. "Гэта быў рух, але нейкі хаатычны, няўпэўнены, які насіў хутчэй характар латання дзірак наўздагон за фактам, які ўжо адбыўся, чым пэўна вывераныя дзеянні на прадухіленне негатыўных момантаў", – заявіў Л.Анфімаў на нарадзе ў прэзідэнта краіны, на якой разглядаліся вынікі сацыяльна-эканамічнага развіцця ў першым квартале, паведамляе “Інтэрфакс”.

Намеснік кіраўніка прэзідэнцкай адміністрацыі лічыць, што "сёння мае месца недаацэнка, а магчыма, нават няправільная ацэнка наяўнага становішча ў эканоміцы". "Яна (ацэнка – ІФ) кладзецца ў аснову рашэнняў, якія прымае ўрад, па выпраўленні сітуацыі ў рэальным сектары эканоміцы", – сказаў Л.Анфімаў.

Ён таксама звярнуў увагу на пытанні выканання ўрадам і мясцовымі органамі ўлады дзяржаўных праграм. У сувязі з гэтым Л.Анфімаў нагадаў пра праграму адраджэння і развіцця малых гарадоў. "У прыватнасці, мясцовым органам улады павінна быць пастаўленае пэўнае заданне пра тое, што ў Смалявіцкім раёне да 2010 года павінны быць адчыненыя столькі кропак прыдарожнага сэрвісу. І няхай службы выканкама бегаюць за прадпрымальнікамі і ўгаворваюць іх укладваць грошы, а не наадварот", – заявіў Л.Анфімаў. "А так атрымоўваецца, што нам прапаноўваюць грошы, а мы "нос вернем", – сказаў намеснік кіраўніка Адміністрацыі прэзідэнта Беларусі.