Міністр энергетыкі ЗША лічыць «кепскай» навіной дамоўленасці Расеі, Туркменіcтана і Казахстана аб газаправодзе :: Хартыя'97 :: Навiны

Еўропа павінна дыверсіфікаваць крыніцы свайго энергетычнага забеспячэння, зазначыў міністр энергетыкі ЗША Сэмюэл Бодман на прэс-канферэнцыі ў Парыжы, інакш яна стане яшчэ больш залежыць ад Расеі: "Еўропа павінна прыняць да ўвагі планы Расеі і адпаведным чынам удакладніць сваю рэакцыю на іх". Так міністр адрэагаваў на трохбаковы план будаўніцтва газаправода з Туркменістана ў Расею.

Лідэры Расеі, Казахстана і Туркменістана 12 траўня дасягнулі дамоўленасці аб будаўніцтве Прыкаспійскага трубаправода ў суботу ў горадзе Туркменбашы (былы Краснаводск). Туркменістан з`яўляецца найбуйнейшым пастаўшчыком газу ў Цэнтральнай Азіі, і шукае новыя экспартныя маршруты для яго транспартоўкі спажыўцам, паведамляе NEWSru.com.

Злучаныя Штаты, еўрапейскія краіны і Кітай хацелі б атрымаць прамы доступ да туркменскага газу, вялікая частка якога цяпер паступае ў Расею па цэнах ніжэйшых за рынкавыя, адзначае агенцтва Reuters. Пагадненне аб Прыкаспійскім газаправодзе ўвайшло ў супярэчнасць з планамі пракладкі Транскаспійскага газаправода ў абыход расейскай тэрыторыі.

Аднак прэзідэнт Туркменістана, адказваючы на пытанні журналістаў аб альтэрнатыўным Транскаспійскім трубаправодзе, адхіліў здагадкі пра тое, што яго цяпер можна лічыць пахаваным. "Ва ўсім свеце ідзе працэс дыверсіфікавання экспартных маршрутаў. Гэтыя пытанні варта прымаць да ўвагі. Гэты праект не пакінуты цалкам", – сказаў Гурбангулы Бердымухамедаў.