Зямля пад Менскам неймаверна даражэе :: Хартыя'97 :: Навiны

“Комсомольская правда в Беларуси” піша пра тое, што ў Менску і абласных гарадах аформіць участак ва ўласнасць стане даражэй, а ў глыбінцы – танней.

7 траўня прэзідэнт падпісаў указ №213 “Аб некаторых пытаннях перадачы зямельных участкаў у прыватную ўласнасць грамадзян Рэспублікі Беларусь”. Сэнс яго ў тым, што цяпер прыватызаваць зямлю трэба будзе па кадастравым кошце, а не па нарматыўнай, як гэта было раней. Гэта значыць, чым бліжэй участак да гарадоў і чым лепш інфраструктура, тым даражэй ён будзе каштаваць. Напрыклад, калі раней участак плошчай шэсць сотак у пяці км ад Менска можна было выкупіць у дзяржавы па нарматыўнай цане прыкладна за $240, то цяпер па кадастравай давядзецца заплаціць ад $4800 да $9000 (за ўчастак у прэстыжным месцы). А гэта ў 20 – 37,5 разоў больш!

А у глыбінцы расцэнкі на зямлю знізяцца: напрыклад, у Чашніцкім раёне Віцебскай вобласці нарматыўная цана ўчастку шэсць сотак – $30 даляраў, а кадастравая – $6 – па даляры за сотку.

– Выкуп зямлі стаў больш справядлівым, бо цяпер улічваецца яе рэальная рынкавая якасць, – лічыць намеснік старшыні Дзяржаўнага камітэта па маёмасці Беларусі Андрэй ГАЕЎ.

Даведацца, у колькі асабіста вам абыдзецца выкуп зямлі ва ўласнасць па новых цэнах, вельмі проста: для гэтага дастаткова зайсці на сайт Нацыянальнага кадастравага агенцтва http://vl.nca.by. Вы можаце выдзеліць раён, назву населенага пункту або садовага таварыства, і кампутар выдасць вам кошт квадратнага метра. Даведацца пра новыя цэны можна і ў выканкаме па месцы размяшчэння вашага ўчастку.

Пачынаць афармленне ва ўласнасць зямлі па новых цэнах можна будзе з моманту афіцыйнага апублікавання ўказу (а адбудзецца гэта, хутчэй за ўсё, у самыя блізкія дні). Нагадаем, з 1 студзеня 2007 года прыватызацыя зямельных участкаў у Беларусі была спыненая.

– Новы ўказ не тычыцца тых, хто мае права на атрыманне ўчасткаў па льготнай цане. Напрыклад, грамадзяне, якія жывуць у нястачы, здолеюць атрымаць участкі для будаўніцтва жылых дамоў па льготнай цане і пасля прыняцця ўказу, – растлумачыў Андрэй Гаеў.