Лукашэнка зноў заклікае да эканоміі і беражлівасці :: Хартыя'97 :: Навiны

Кантроль за выкарыстаннем бюджэтных сродкаў у дзейнасці міністэрстваў, ведамстваў, праваахоўных органаў Беларусі павінен быць узмоцнены. Такую задачу паставіў Аляксандр Лукашэнка 14 траўня падчас дакладу старшыні Камітэта дзяржаўнага кантролю Зянона Ломаця пра вынікі працы ведамства за чатыры месяцы гэтага года, паведамілі БелТА ў прэс-службе беларускага кіраўніка.

Дзякуючы прынятым Камітэтам дзяржкантролю мерам у дачыненні суб`ектаў гаспадарання, якія парушылі нормы заканадаўства Беларусі, у прыбытак дзяржавы паступілі каля Br22,3 млрд.

Лукашэнка падкрэсліў, што Камітэт дзяржаўнага кантролю павінен выходзіць на больш высокі ўзровень працы. Супрацоўнікі павінны быць выключна кампетэнтнымі людзьмі і добра валодаць сітуацыяй.

КДК у сваёй дзейнасці актыўна выкарыстае практыку комплексных праверак міністэрстваў і ведамстваў. Так, Лукашэнка даў згоду на правядзенне праверкі працы Дзяржаўнага мытнага камітэта і яго структур у другім паўгоддзі.

На сустрэчы былі закранутыя пытанні дзейнасці рэальнага сектара эканомікі, у прыватнасці рэалізацыі прадукцыі цэментавых заводаў. Па словах Зянона Ломаця, усталяваныя факты, калі некаторыя індывідуальныя прадпрымальнікі закупляюць у вытворцаў цэмент па адпускной цане для наступнага перапродажу ў два–тры разы даражэй. Аляксандр Лукашэнка запатрабаваў разабрацца з гэтай сітуацыяй.

У хуткім часе Камітэт дзяржкантролю таксама мае намер засяродзіць увагу на праблемах эфектыўнага выкарыстання дзяржаўнай маёмасці, найперш, на пытаннях здачы ў арэнду памяшканняў.