У дні Кангрэса дэмсілаў у Палацы рэспублікі будуць праходзіць Дні Масквы і «Лебядзінае возера» :: Хартыя'97 :: Навiны

Яшчэ дзве канцэртныя залы адмовіліся даць прадстаўнікам апазіцыі памяшканне для правядзення Кангрэса дэмсілаў. Адміністрацыя к/з “Менск” спасылаецца на тое, што памяшканне забраніраванае Студыяй сучаснай харэаграфіі, у Палацы Рэспублікі ў гэты час будуць праходзіць Дні Масквы і балет “Лебядзінае возера”.

– Учора мы адправілі па пошце апавяшчальны ліст пра тое, што на 26–27 траўня ў нас запланаваныя канцэрты, – растлумачылі «Салідарнасці» ў прыёмнай к/з “Менск”. – Залу здымае Студыя сучаснай харэаграфіі. Яны раней падалі заяўку.

У Студыі сучаснай харэаграфіі сапраўды пацвердзілі, што на 27 траўня ў іх запланаваны штогадовы справаздачны канцэрт у к/з “Менск”, праўда, пра гэта адміністрацыя канцэртнай залы была апавешчаная яшчэ паўгода таму.

Што ж тычыцца Палаца Рэспублікі, то яго адміністрацыя таксама гэтымі днямі накіравала сваю адмову лідэрам апазіцыі.

– У гэтыя дні ў нас плануюцца Дні Масквы і выступ нацыянальнага балета, – распавёў намеснік начальніка канцэртнага аддзела Палаца Рэспублікі Аляксандр Абразаў. – Як раз у гэтыя дні ў нас будзе ісці балет “Лебядзінае возера”.

Нагадаем, яшчэ раней у памяшканні для правядзення Кангрэса адмовіла адміністрацыя Палаца культуры Менскага аўтазавода, спаслаўшыся на фэст творчасці дзяцей і моладзі з абмежаванымі магчымасцямі "Запалі сваю зорку", прымеркаваны да Міжнароднага Дня абароны дзяцей.