Еўразвяз памякчыў санкцыі ў дачыненні Узбекістана :: Хартыя'97 :: Навiны

Кіраўнікі МЗС краін Еўразвяза прынялі рашэнне палегчыць санкцыі, уведзеныя супраць Узбекістана, у надзеі, што гэтая краіна палепшыць сітуацыю з правамі чалавека. У прыватнасці, з спісу, які ўключаў дванаццаць афіцыйных асоб Узбекістана, якім забаронена выдаваць уязныя візы ў краіны ЕЗ, выключаныя чацвёра ўзбекскіх службоўцаў. Іх імёны пакуль не абвешчаныя. Іншыя важныя меры, напрыклад, эмбарга на продаж узбраенняў, застаюцца ў сіле.

Санкцыі супраць Узбекістана былі ўведзеныя пасля адмовы ўлад гэтай краіны правесці сумеснае расследаванне падзей 2005 года ў Андзіжане, дзе падчас беспарадкаў загінулі дзесяткі людзей. Пры гэтым узбекскі бок настойвае на тым, што падзеі ў Андзіжане былі тэрарыстычным актам, расследаванне якога заняло 2800 тамоў дасье і запатрабавала больш як 3200 судовых экспертыз, у яго ходзе былі дапытаныя 11 тысяч сведак і пацярпелых.

Сябра Еўрапейскай камісіі, якая адказвае за міжнародныя сувязі, Беніта Ферэра-Вальднер растлумачыла, што перагляд санкцый павінен дапамагчы Узбекістану зрабіць новыя крокі ў сферы забеспячэння правоў чалавека, паведамляе ІТАР-ТАСС.

У заяве міністраў замежных спраў краін ЕЗ адзначаецца, што ЕЗ “ацаніў гатоўнасць Узбекістана да дыялога”. Рашэнне ЕЗ выклікала незадаволенасць з боку праваабарончай арганізацыі Human Rights Watch, якая лічыць, што неабходна працягваць аказваць ціск на Узбекістан.

Як паведамлялася раней, у Еўрапейскім Звязе кажуць пра тое, што "санкцыі – гэта цяжкі арсенал сродкаў ЕЗ, яны ўжываюцца ў крайнім выпадку і не могуць быць скасаваныя з лёгкасцю".

Нагадаем, што Узбекістан з`яўляецца другой краінай у СНД пасля Беларусі, у дачыненні якой Еўразвяз увёў санкцыі на наведванне вышэйшымі службоўцамі краін-сябраў Шэнгенскага пагаднення.

Раней Еўракамісія абвясціла пра забарону на ўезд у ЕЗ Аляксандра Лукашэнкі і 30 вышэйшых беларускіх службоўцаў, пра замарожванне ў еўрапейскіх банках іх асабістых рахункаў і здыманні прэферэнцый у гандлі ў адказ на разгон дэманстрацыі апазіцыі ў Менску і арышту яе лідэраў.