Мілінкевіч заклікаў краіны ААН не прымаць урад Беларусі ў склад Рады па правах чалавека :: Хартыя'97 :: Навiны

Напярэдадні свайго візіту ў Вялікую Брытанію і маючага адбыцца ў чацвер у Нью-Ёрку галасавання аб прыняцці новых сяброў у Раду ААН па правам чалавека, старшыня Палітрады дэмакратычных сілаў Аляксандр Мілінкевіч накіраваў Заяву дзяржавам-сябрам ААН не падтрымліваць кандыдатуры урада Беларусі на выбарах ў Раду па правах чалавека ААН. “Беларускія дэмакратычныя сілы разам з дэмакратычнымі няўрадавымі арганізацыямі выступаюць супраць надання беларускаму ўраду месца ў органе ААН, мэтай якога з`яўляецца заахвочванне паўсюднай павагі да абароны ўсіх правоў чалавека і асноўных свабодаў”, адзначаецца ў заяве.

“У 2006 годзе становішча з грамадзянскімі, палітычнымі, эканамічнымі, сацыяльнымі і культурнымі правамі чалавека ў Беларусі няўхільна пагаршалася. У Беларусі ёсць палітычныя зняволеныя – у турме знаходзяцца лідэр Беларускай сацыял-дэмакратычнай партыі і былы кандыдат у прэзідэнты Аляксандр Казулін, палітычныя лідэры і грамадскія актывісты Мікола Статкевіч, Павал Севярынец, Зьміцер Дашкевіч, Андрэй Клімаў, Артур Фінкевіч, Мікола Аўтуховіч, Кацярына Садоўская”.

“Парушаючы ўласныя міжнародныя і нацыянальныя абавязальніцтвы, замацаваныя ў дакументах ААН і АБСЕ, а таксама ў Канстытуцыі Беларусі урад Беларусі не адпавядае мінімальным міжнародным стандартам у сферы абароны правоў чалавека”, - адзначае лаўрэат прэміі Еўрапарламента ім. А. Сахарава "Свабода думкі" за 2006 год.

“За апошняе дзесяцігоддзе як ААН, так і рэгіянальныя міжнародныя арганізацыі рэгулярна выступалі з асуджэннем урада Беларусі у сферы захавання правоў чалавека, які пастаянна пагаршаецца. Сёння членства урада Беларусі ў Радзе па правах чалавека ў нацыянальным вымярэнні паслужыць толькі мэтам афіцыйнай прапаганды і пацягне за сабой далейшае пагаршэнне становішча па правам чалавека, у міжнародным вымярэнні беларускі ўрад выкарыстае сваё членства ў якасці шчыта”.

Адначасова, з улікам таго, што становішча ў галіне правоў чалавека ў Беларусі вымагае адмысловай увагі з боку Рады па правах чалавека і іншых органаў ААН, кіраўнік Палітычнай рады дэмакратычных сілаў заклікаў падоўжыць мандат Спецыяльнага дакладчыка Рады па правах чалавека па сітуацыі ў сферы правоў чалавека ў Беларусі.