Суд над Юрыем Зянковічам перанесены на 17 траўня :: Хартыя'97 :: Навiны

Суд над сябрам Сойма Партыі БНФ Юрыем Зянковічам перанесены на 17 траўня, на 17.00. Пра гэта прэс-цэнтру Хартыі’97 паведаміў праваабаронца Уладзімір Лабковіч. Працэс па справе палітыка перанесены на просьбу адваката Аляксандра Галіева, які не здолеў сёння прысутнічаць у судзе Савецкага раёна Менска. Справу Зянковіча будзе разглядаць суддзя Аксана Ралява, уключаная Еўразвязам у спіс невыязных беларускіх службоўцаў за вынясенне палітычна матываваных прысудаў.

Адзін з арганізатараў акцыі "Чарнобыльскі шлях – 2007", сябра Партыі БНФ Юры Зянковіч быў затрыманы 16 траўня ў Менску. На палітыка быў складзены пратакол аб парушэнні артыкула 23.34 Кодэкса аб адміністрацыйных правапарушэннях (парушэнне грамадскага парадку падчас правядзення масавых мерапрыемстваў).

"Пратакол складзены на падставе сведчанняў супрацоўнікаў ДАІ, якія сцвярджаюць, што калона ўдзельнікаў "Чарнобыльскага Шляху", рухаючыся ад вуліцы Якуба Коласа па вуліцы Сурганава, выйшла на падарожную частку і замінала руху транспарту, – сказаў Ю.Зянковіч. – Я растлумачыў супрацоўнікам Савецкага РУУС, што заклікаў удзельнікаў шэсця ісці па ходніках. Акрамя таго, дагэтуль у Менскім гарадскім судзе знаходзіцца мая касацыйная скарга на рашэнне Менгарвыканкама, які змяніў маршрут правядзення "Чарнобыльскага Шляху – 2007".

Акрамя таго, на ходніках вуліцы Сурганава, дзе дэманстранты змушаныя былі выйсці на падарожную частку, гэтым часам праходзілі будаўнічыя працы, і праходжанне там людзей было небяспечным для іх здароўя і нават жыцця.