Канада не падтрымае абранне Беларусі ў Раду ААН па правах чалавека :: Хартыя'97 :: Навiны

"Канада не падтрымлівае абранне Беларусі ў Раду ААН па правах чалавека і будзе апеляваць да іншых дзяржаў - сябраў ААН галасаваць за Славенію і Боснію і Герцагавіну", - гаворыцца ў лісце канадскага ўрада да старшыні Палітрады дэмакратычных сілаў Беларусі Аляксандра Мілінкевіча. "Урад Канады сур`ёзна непакоіць факт адносна магчымага абрання парушальнікаў правоў чалавека ў Раду ААН па правах чалавека. Некалькі месяцаў назад Генеральная Асамблея ААН асудзіла Беларусь за "устойлівае пагаршэнне сітуацыі з правамі чалавека" і за адмову ўрада Беларусі супрацоўнічаць у рамках усіх механізмаў Рады ААН па правах чалавека", - падкрэсліваецца ў лісце.

Улады Канады адзначаюць, што "абранне Беларусі, а таксама іншых дзяржаваў, якія асуджаюцца Генеральнай Асамблеяй за парушэнне ў галіне абароны правоў чалавека, будзе сведчыць аб дыскрэдытацыі самой Рады ААН па правах чалавека".

Аляксандр Мілінкевіч заклікаў дзяржавы - сябры ААН не падтрымліваць Беларусь на выбарах ў Раду па правах чалавека ААН. Напярэдадні свайго візіту ў Вялікую Брытанію і маючага адбыцца ў чацвер у Нью-Ёрку галасавання аб прыняцці новых сяброў у Раду ААН па правам чалавека, Аляксандр Мілінкевіч накіраваў Заяву дзяржавам - сябрам ААН не падтрымліваць кандыдатуру ўрада Беларусі на выбарах ў Раду па правах чалавека ААН.