Кіпр і Мальта ўводзяць еўра :: Хартыя'97 :: Навiны

Еўракамісія дазволіла Кіпру і Мальце ўвесці адзіную еўрапейскую валюту еўра з 1 студзеня 2008 года. Увесці еўра на тэрыторыі сваёй краіны маюць права толькі сябры Еўразвяза. Пры гэтым яны павінны адпавядаць крытэрам еўразоны па шэрагу макраэканамічных паказчыкаў, у прыватнасці, па тэмпах росту цэнаў і стаўцы рэфінансавання.

14 траўня Еўракамісія прадставіла інфармацыйны інтэрнэт-рэсурс Падаткі ў Еўропе. Ён аб`ядноўвае звесткі прыкладна пра 500 падаткаў, наяўных у краінах-сябрах ЕЗ. База дадзеных складзеная пры ўдзеле Міністэрстваў фінансаў еўрапейскіх дзяржаў.

Па паведамленні НІК Падаткі, базу дадзеных плануецца абнаўляць штогод. Неўзабаве яе папоўняць раздзелы аб Ірландыі, Мальце, Кіпры і Партугаліі. Падаткі, наяўныя ў гэтых краінах, пакуль не прадстаўленыя на сайце.

Кіпр і Мальта ўступілі ў ЕЗ у 2004 годзе. Сярод новых сябраў альянсу цяпер еўрапейская валюта дзейнічае толькі на тэрыторыі Славеніі. Раней меркавалася, што Кіпр і Мальту здольныя абагнаць Латвія, Літва і Эстонія. Аднак у Прыбалтыцы не здолелі знізіць інфляцыю да належнага ўзроўню, з прычыны чаго гэтыя краіны адклалі ўступленне ў еўразону. Латвія і Эстонія ўжо заявілі, што не ўвядуць еўра раней за 2009 год.

У самыя блізкія гады чакаецца далучэнне да зоны еўра Вугоршчыны, Чэхіі і, магчыма, Польшчы.