Беларускія службоўцы вядуць у Жэневе перамовы аб скасаванні эканамічных санкцый :: Хартыя'97 :: Навiны

14 траўня беларуская ўрадавая дэлегацыя вылецела ў Жэневу, дзе цяпер праводзіць перамовы ў штаб-кватэры Міжнароднай арганізацыі працы (МАП). На парадку дня перамоваў у МАП стаіць пытанне адмены рашэння аб выключэнні Беларусі з Генеральнай сістэмы прэферэнцый, у выніку чаго краіна пазбавіцца 400 млн. еўра ў год.

Пра ход перамоваў у Жэневе цяпер мала што вядома, аднак у Міністэрстве працы і сацабароны Беларусі "Салiдарнасцi" паведамілі, што візіт беларускай урадавай дэлегацыі завершыцца ў пятніцу ў другой палове дня.

Рашэнне МАП аб выключэнні Беларусі з Генеральнай сістэмы прэферэнцый у гандлі з Еўразвязам павінна ўступіць у сілу 21 чэрвеня. У той самы час прадстаўнікі Еўразвяза ўвесь час падкрэсліваюць, што ЕЗ гатовы спыніць гэты працэс пры ўмове выканання Беларуссю 12 прад`яўленых раней патрабаванняў.

"Еўрапейскі Звяз заўсёды гатовы спыніць працэс выключэння Беларусі з Генеральнай сістэмы прэферэнцый. Трэба зразумець, чаму гэта адбылося. Выключэнне Беларусі з сістэмы прэферэнцый – гэта адказ на ўшчамленне правоў прафсаюзаў у Беларусі", – растлумачыла некалькімі днямі раней кіраўніца працоўнай групы Парламенцкай Асамблеі АБСЕ (ПА АБСЕ) па Беларусі, дэпутатка Бундэстага Ута Цапф.

"Міжнародная арганізацыі працы дала Беларусі час змяніць гэтыя ўмовы, але яны так і не былі змененыя, што і пацягнула за сабою адмену прэферэнцый", – распавяла Ута Цапф.

"Але нават у гэтым выпадку ў Беларусі яшчэ ёсць магчымасць змяніць сваё заканадаўства такім чынам, каб правы прафсаюзаў не былі ўшчэмленыя. Калі Беларусь не хоча выключэння з сістэмы прэферэнцый, яе ўрад мусіць распачаць адпаведныя крокі. Прапановы існуюць, імі застаецца толькі скарыстацца", – нагадала кіраўніца працоўнай групы ПА АБСЕ па Беларусі.