Іран будзе будаваць у Беларусі гідраэлектрастанцыі :: Хартыя'97 :: Навiны

Беларусь і Іран разглядаюць магчымасць супрацоўніцтва ў галіне будаўніцтва гідраэлектрастанцый у нашай краіне. Пра гэта паведаміў карэспандэнту БелТА першы намеснік генеральнага дырэктара – галоўны інжынер ДВА "Белэнерга" Аляксандр Сівак.

Суразмоўца адзначыў, што ў красавіку гэтага года прадстаўнікі "Белэнерга" наведалі Іран, дзе азнаёміліся з патэнцыялам іранскага боку ў частцы будаўніцтва гідраэлектрастанцый і вытворчасці асноўнага энергетычнага абсталявання як для ГЭС, так і для цеплавых станцый. Іранскія спецыялісты могуць аказаць дапамогу ў праектаванні гідраэлектрастанцый.

Па словах Аляксандра Сівака, гаворка ідзе пра магчымае супрацоўніцтва ў галіне рэалізацыі праектаў па будаўніцтве Гарадзенскай і Полацкай ГЭС. У той самы час ён падкрэсліў, што ўсё будзе вызначацца па тэндэры.

Нагадаем, у Беларусі да 2010 года плануецца пабудаваць Гарадзенскую гідраэлектрастанцыю магутнасцю 17 Мвт на рацэ Нёман і Полацкую ГЭС (23 Мвт) на рацэ Заходняя Дзвіна. Магутнасць кожнай з гэтых станцый будзе вышэйшая за сумарную ўсіх дзейных цяпер ГЭС у Беларусі.

Праекты па будаўніцтве Гарадзенскай і Полацкай ГЭС уключаныя ў дзяржпраграму інавацыйнага развіцця Беларусі на 2007–2010 гады. На іх рэалізацыю плануецца накіраваць Br 143,38 млрд. і Br 149,78 млрд. адпаведна.