Кадыраў хоча стаць кіраўніком усяго Паўночнага Каўказа :: Хартыя'97 :: Навiны

Прэзідэнт Чачэніі Рамзан Кадыраў, які пабываў у мінулую нядзелю ў Кабардзіна-Балкарыі, прапанаваў лідэрам рэгіёнаў Паўднёвай федэральнай акругі "сустракацца раз у месяц і вызначаць, як жыць далей". Гэта першы афіцыйны візіт Кадырава ў суб`ект РФ.

Такім чынам, менш чым праз паўтара месяцы пасля інаўгурацыі чачэнскі лідэр пачаў апраўдваць прагнозы аналітыкаў, якія меркавалі, што крэсла прэзідэнта рэспублікі не мяжа яго палітычных амбіцый і Кадыраў яшчэ заявіць пра сабе на ўзроўні федэральнай акругі, піша газета “Время новостей”, адзначаючы, што фармальна Рамзан Кадыраў ужо больш за два гады з`яўляецца дарадцай паўнамоцнага прадстаўніка прэзідэнта ў Паўднёвай федэральнай акрузе Дзмітрыя Казака.

Кадыраў заявіў, што чачэнцаў дарма лічаць бандытамі і тэрарыстамі. "Насамрэч чачэнцы абаранілі Расею ад тых, хто хацеў разваліць яе праз Каўказ, – сказаў прэзідэнт Чачэніі. – Чачэнская рэспубліка была выпрабавальнай тэрыторыяй, замежныя спецслужбы хацелі паглядзець, наколькі ўпэўнена яны здолеюць надалей выступаць супраць Расеі праз поўдзень. А мы даказалі, што ў іх гэта не атрымаецца. Эканоміку падняць не праблема, галоўнае – не даць злоснікам зацягнуць моладзь у хаос вайны".

Прэзідэнт Кабардзіна-Балкарыі Арсен Канакоў таксама заявіў, што і народы Каўказа і расейскі цэнтр хочуць, каб на поўдні Расеі было спакойна. "Цяпер шмат што ў Расеі вырашаецца на поўдні, і мы не дапусцім тут расколу і расхіствання сітуацыі. Калі ў Чачэнскай рэспубліцы будзе спакойна, у шматлікіх рэспубліках Паўночнага Каўказа таксама ўсё супакоіцца", – сказаў Канакоў. Ён таксама дадаў, што бачыць, якой усенароднай падтрымкай карыстаецца прэзідэнт Чачэніі і тое, што ўся рэспубліка "стала суцэльнай будпляцоўкай".

Газета адзначае, што на Паўночным Каўказе гасціннасць з`яўляецца часткай не толькі бытавой, але і палітычнай культуры. Кіраўнікі рэгіёнаў сустракаліся і раней – "у рамках пратаколу і нефармальна, па згодзе і змушана, блізкія сябры і заклятыя ворагі".

Рэгулярна наведвалі адзін аднаго лідэры трох "адыгскіх" рэспублік – Адыгеі, Карачаева-Чаркесіі і Кабардзіна-Балкарыі, у якіх пражываюць этнічна роднасныя адыгейцы, чаркесы і кабардзінцы. У той самы час у 1991 годзе кіраўнік Карачаева-Чаркесіі Уладзімір Хубіеў быў змушаны супраць сваёй волі прыняць толькі што абранага прэзідэнта Чачэніі Джахара Дудаева, які прыбыў каб ушанаваць памяць карачаеўцаў, якія гэтак сама, як і чачэнцы, інгушы і балкарцы, былі дэпартаваныя пры Сталіне.

Кантакты паміж чачэнскімі і інгушскімі ўладамі заўсёды былі рэгулярнымі. А вось з стасункамі паміж прэзідэнтамі Паўночнай Асеціі і Інгушэціі заўсёды было складана з прычыны рознагалосся наконт прыналежнасці Прыгараднага раёна, якое ўвосень 1992 года вылілася ва ўзброены канфлікт. Хоць вастрыня канфлікту значна знізілася, сустрэчы цяперашняга кіраўніка Паўночнай Асеціі Таймураза Мамсурава з прэзідэнтам Інгушэціі Муратам Зязікавым усё яшчэ носяць добраахвотна-прымусовы характар і праходзяць пад абавязковым патранажам федэральных службоўцаў, піша газета.

Выданне адзначае, што кантакты лідэраў рэспублік праходзілі незалежна ад ваеннай сітуацыі ў рэгіёне. У верасні 1999 года, на фоне баёў у Дагестане, у новай інгушскай сталіцы Магасе адбыліся перамовы лідэраў Чачэніі, Інгушэціі і Паўночнай Асеціі ў спробе пазбегнуць пачатку другой вялікай вайны.

Усе разам прэзідэнты Паўночнага Каўказа збіраюцца ў асноўным на нарадах у паўнамоцнага прадстаўніка прэзідэнта Дзмітрыя Казака. У апошнія гады змяніліся пяць каўказскіх прэзідэнтаў: У 2005-м прэзідэнта Паўночнай Асеціі Аляксандра Дзасохава змяніў Таймураз Мамсураў, прэзідэнта Кабардзіна-Балкарыі Валерыя Кокава – Арсен Канакоў. У 2006-м новы прэзідэнт Муху Аліеў узначаліў Дагестан, у студзені 2007-га кіраўнік Адыгеі Хазрэт Саўмен саступіў сваё крэсла Аслану Тхакушынаву і ў 2007 годзе прэзідэнтам Чачэніі стаў Рамзан Кадыраў.

Самы экстравагантны з каўказскіх лідэраў ужо пачаў наносіць візіты: суседскія традыцыі застаюцца нязменнымі, адзначае газета.