3 ліпеня ў Менску адбудзецца вайсковы парад :: Хартыя'97 :: Навiны

Узброеныя сілы Беларусі рыхтуюцца да правядзення святочнага параду, прысвечанага святкаванню 3 ліпеня афіцыйнага Дня незалежнасці, а насамрэч – Дня вызвалення Менска ад нямецка-фашысцкіх захопнікаў.

"Парадныя разлікі ўжо размешчаныя на тэрыторыі Менскага гарнізона. З 17 траўня па 21 чэрвеня пройдуць трэніроўкі пешых калон на страявым пляцу 120 асобнай гвардзейскай механізаванай брыгады", – паведамілі “Інтэрфаксу” ў прэс-службе Міністэрства абароны.
Па словах супрацоўнікаў прэс-службы, трэніроўкі знаменных груп і страявыя заняткі з асабістым складам будуць праходзіць да 25 чэрвеня. Генеральныя трэніроўкі пешых разлікаў пройдуць 27 і 30 чэрвеня ў раёне правядзення параду на скрыжаванні пр. Пераможцаў і пр. Машэрава

У гэтым годзе ў склад парадных разлікаў увойдуць выхаванцы Менскай сувораўскай вайсковай вучэльні, афіцэры, курсанты Вайсковай акадэміі Беларусі і вайсковага факультэта Беларускага нацыянальнага тэхнічнага ўніверсітэта, вайскоўцы 120 асобнай гвардзейскай механізаванай брыгады, 38 асобнай гвардзейскай мабільнай брыгады, 86 брыгады сувязі і 103 асобнай гвардзейскай мабільнай брыгады, паведамілі ў Мінабароны.

Там адзначылі, што ў парадзе традыцыйна возьме ўдзел зводная рота ганаровай варты з новай праграмай пляц-канцэрту.

Вайсковы парад пройдзе пад музычнае суправаджэнне зводнага аркестра пад кіраўніцтвам начальніка вайскова-аркестравай службы Узброеных сілаў.